Flutningaskipið Amy sem siglir undir portúgölskum fána var á leiðinni frá Tálknafirði eftir að hafa flutt þangað fóðurpramma Arctic Fish þegar skipið tók niðri og göt komu á botn þess. Rannsókn lögreglunnar á Vestfjörðum er á lokametrunum en ólíklegt er að um sé að ræða brot á siglingalögum. Skipið var ekki á mikilli ferð og var að vinna eðlilega vinnu. Enginn hafnsögumaður fór um borð í skipið en allur gangur er á því hvort þörf þykir á slíku, segir Elvar Steinn Karlsson, hafnarstjóri á Tálknafirði. Hann segir ekki hafa verið óskað eftir lóðs en það sé alltaf ákvörðun skipafélagsins. Viðgerðir standa yfir og vonast er til þess að skipið geti siglt burt í lok vikunnar.