Móðir ungs Íslendings sem ekki hefur spurst til í rúma þrjá mánuði segir það mjög ólíkt honum að láta ekki vita af sér. Hún hefur ekki fengið upplýsingar frá spænsku lögreglunni um það hvort hann hafi raunverulega ráðið sig í vinnu á skemmtiferðaskipi líkt og hann tjáði henni áður en hann hvarf. Pedro Snær Riveros er 25 ára gamall og hefur búið stærstan hluta ævinnar á Spáni. Í byrjun ágúst tjáði hann móður sinni, Hörpu Halldórsdóttur, að hann hefði ráðið sig í vinnu sem kokkur á skemmtiferðaskipinu Allure of the Seas. Til hans hefur ekki spurst síðan. Harpa vakti athygli á máli Pedros Snæs á Facebook í morgun, en hún tilkynnti lögreglu um hvarf hans í september. Alþjóðadeild ríkislögreglustjóra á í samskiptum við spænsku lögregluna vegna málsins og borgaraþjónusta Utanríkisráðuneytisins er meðvituð um það. Í samtali við fréttastofu segist Harpa upplifa að málið vinnist hægt hjá spænsku lögreglunni. Um viku eftir að hún tilkynnti hvarfið fór lögregla um borð í Allure of the Seas þegar skipið var við bryggju á Ítalíu. Pedro var ekki um borð og var ekki á lista yfir áhafnarmeðlimi. Harpa segir að illa gangi að fá upplýsingar um það frá lögreglunni hvort hann hafi nokkurn tímann ráðið sig í vinnu á eða verið um borð í skipinu. Pedro Snær bjó í Barcelona ásamt systur sinni áður en hann hvarf. Harpa segir hann ekki í neinni óreglu og smakki ekki áfengi.