Vaxtaákvörðun Seðlabankans er eftir slétta viku. Samtök iðnaðarins hafa unnið greiningu þar sem niðurstaðan er að bankinn þurfi að lækka vexti eftir atburði undangenginna vika. Ingólfur Bender, aðalhagfræðingur Samtaka iðnaðarins, segir samtökin sérstaklega horfa til raða áfalla sem hafi dunið á útflutningsatvinnuvegum síðustu mánuði í greiningunni. Áföllin hafi gert það að verkum að efnahagshorfur hafi versnað til muna. „Síðan sjáum við mjög glögglega í tölum að það er farið að hægja verulega á og komið reyndar samdráttur á öllum megingreinum iðnaðarins til að mynda sem að náttúrlega vegur þungt í okkar hagkerfi.“ Hann segir hagvaxtarhorfur hafa versnað en að hliðarverkunin af því sé að verðbólgan lækki; því séu miklar líkur á því að verðbólgan fari niður í verðbólgumarkmið Seðlabankans á næsta ári, vextirnir bremsi hagkerfið hratt af. Samtök iðnaðarins kalla eftir stýrivaxtalækkun og Ingólfur segir það brýnt að strax verði farið í lækkunina, bankinn þurfi að vera framsýnn í sínum aðgerðum. Samtökin kalli sömuleiðis eftir því að verðbólgan verði metin eins og hún kemur til með að vera á næstu tveimur árum og hagvaxtarskilyrði á þeim tíma. „Áhrifin af stýrivöxtunum tekur alveg 12 - 18 mánuði að hafa áhrif. Að vera bregðast við verðbólgu eins og hún var í síðasta mánuði eða þá verðbólgu eins og hún kemur til þess að vera í næsta mánuði er ekki rétt peningastjórnun.“ Ingólfur telur kostnaðinn við það að lækka ekki stýrivextina í næstu viku vera mikinn, langt sé í næsta vaxtaákvörðunardag og það sé til mikils að vinna að bíða ekki með svo stóra ákvörðun. Hildur Margrét Jóhannsdóttir aðalhagfræðingur Landsbankans segir að ýmislegt hafi breyst frá seinustu vaxtarákvörðun, til dæmis hafi vaxtadómur fallið á lánveitendur og þeir brugðist við honum. Landsbankinn spáir fyrir um að stýrivextir haldist óbreyttir. Verðbólga jókst umfram væntingar í október og Hildur segir hækkunina hafa borið þess merki að undirliggjandi verðbólguþrýstingur hafi aukist og að verðbólguhorfur til allra næstu mánaða séu ekki nægilega bjartar. „Við sem höfum það hlutverk að spá fyrir um ákvörðun seðlabankans við þurfum að reyna horfa á þá mælikvarða sem að vega þyngst í þeirra ákvörðunum og svona miðað við þá mælikvarða eru horfurnar ekki nógu bjartar.“ Meginhlutverk Seðlabankans er að tryggja verðstöðugleika í landinu. Hildur telur að Seðlabankanum sé annt um að tryggja sinn trúverðugleika og taki sínu meginhlutverki mjög alvarlega. Íslandsbanki gaf út hagspá sína í dag, bankinn spáir líkt og Landsbankinn óbreyttum vöxtum í bili. „Þannig að ég held að þeim gæti fundist dálítið erfitt að taka strax skref til lækkunar vaxta í næstu viku með þessar verðbólgutölur til grundvallar.“ Hildur tekur þó fram að ákvörðun Seðlabankans sé ekki augljós. Hugsanlega taki peningastefnunefnd þá ákvörðun að vera framsýnni heldur en hún hefur verið. Þá megi vera að vextirnir komi til með að vera lækkaðir lítillega núna til þess að koma í veg fyrir kólnun hagkerfisins á næsta ári. Sjálf telur hún þó líklegra að Seðlabankinn bíði með lækkunina og sjái hvert hagkerfið stefni á næstu vikum og mánuðum. Vaxtaákvörðun Seðlabankans er eftir slétta viku. Samtök iðnaðarins hafa unnið greiningu sem birt verður á morgun, aðalhagfræðingur samtakanna segir það vera dýrkeypt að lækka vextina ekki strax, Seðlabankinn þurfi að horfa til lengri tíma.