Hæstiréttur Bandaríkjanna hafnaði í dag áætlunum ríkisstjórnar Donalds Trump um að senda þjóðarvarðliða til Chicago-borgar. Dómarar höfnuðu beiðni dómsmálaráðuneytis Bandaríkjanna sem farið hafði fram á að felldur yrði úr gildi úrskurður sem komið hefur í veg fyrir að hundruð þjóðvarðarliðsmanna verði sendir til borgarinnar. Úrskurðurinn kom eftir að embættismenn í Illinois-ríki höfðuðu mál gegn ríkisstjórninni. Dómsmálaráðuneytið hafði beðið Hæstarétt um leyfi til að senda þjóðvarðarliðið til borgarinnar á meðan réttarhöld færu fram. Þjóðvarðliðið er hluti bandaríska hersins sem ríkisstjórar geta kallað til vegna hættu- eða neyðarástands. Við sérstakar aðstæður er forseta heimilt að kalla eftir aðstoð þjóðvarðliðsins. Mikið þarf því að liggja við svo liðið sé kallað út. Ríkisstjórn Trump hafði áður kallað út þjóðvarðliðið meðal annars til borganna Los Angeles í Kaliforníu og til Washington-borgar. Trump hafði lýst því yfir að neyðarástand ríkti í borgunum vegna glæpa og mótmæla. Atkvæði dómaranna voru sex á móti þremur og taldi meirihluti þeirra að ekki hefði verið sýnt fram á nauðsyn þess að senda þjóðvarðlið til Chicago-borgar. Þeir töldu yfirvöld borgarinnar hafa næg úrræði til þess að leysa mögulegan vanda borgarinnar án inngrips frá ríkisstjórninni. Þeir þrír dómarar sem töldu að leyfa ætti þjóðvarðliða í Chicago voru þeir Samuel Alito, Clarence Thomas og Neil Gorsuch sem alla jafna eru þeir dómarar sem taldir eru hvað hægri sinnaðastir.