Frakkinn Thierry Breton er meðal fimm Evrópumanna sem Bandaríkjastjórn hefur meinað um vegabréfsáritun þangað. Nokkrir þeirra vinna fyrir stofnanir sem ætlað er að draga úr upplýsingaóreiðu. Utanríkisráðherrann Marco Rubio sakar þá um ritskoðunartilburði í garð þarlendra hátæknifyrirtækja með það markmið að hamla útbreiðslu bandarískra viðhorfa, sem þeim líki ekki. Þannig hafi lengi háttað í Evrópu. Fimmmenningarnir eru kallaðir öfgafullir andófsmenn í yfirlýsingu stjórnvalda. Breton átti sæti í framkvæmdastjórn Evrópusambandsins og var einn af valdamestu embættismönnum hennar, fór meðal annars með málefni innri markaðarins. Hann sagði skyndilega af sér í september 2024. Breton segir nornaveiðar McCarthy-tímabilsins snúnar aftur vestra, þegar stjórnvöld ofsóttu fólk grunað um að vera hallt undir kommúnisma eða hliðhollt Sovétríkjunum.