Lögreglumenn rannsaka vettvanginn þar sem Fanil Sarvarov lét lífið.EPA / MAXIM SHIPENKOV Rannsókn stendur yfir í rússnesku höfuðborginni Moskvu vegna „alvarlegs atviks“ í gær þar sem tveir umferðarlögreglumenn týndu lífi. Þeir höfðu stöðvað grunsamlegan vegfaranda þegar sprenging varð. Svæðið var fljótlega girt af. Fjölmiðlar segja sprenginguna hafa orðið skammt þaðan sem bílsprengja drap hershöfðingjann Fanil Sarvarov á sunnudag og að sérstök rannsóknarnefnd um alvarlega glæpi hafi málið á sinni könnu. Úkraínumönnum hefur verið kennt um nokkrar árásir á háttsetta herforingja í Rússlandi og á hernumdum svæðum í Úkraínu. Stjórnvöld í Kyiv hafa gengist við nokkrum atlaganna en hafa ekki enn tjáð sig um tilræðið við Sarvarov.