Erilsamur sólarhringur er að baki hjá Slökkviliði höfuðborgarsvæðisins. Í færslu á Facebook-síðu þeirra segir að það hafi farið í 115 sjúkraflutninga sem sé í meira lagi miðað við að það hafi verið frídagur. 19 þeirra voru forgangsflutningar. Ásgeir Valur Flosason aðstoðarvarðstjóri segir verkefni síðasta sólarhrings hafa verið alls konar. Mikið til hafi þetta verið flutningar milli sjúkrastofnana, flytja þurfti fólk til skoðunar eða í og úr jólaboðum. Eitthvað var um flutninga út úr borginni. Dælubílar fóru í fjögur verkefni sem voru öll minniháttar. Það kviknaði í skrauti á leiði í kirkjugarði og reykræsta þurfti íbúð eftir að poki hafði gleymst á eldavél. Ásgeir segir engin slys hafa orðið á fólki. Þar sem jólafrídagar eru afstaðnir er slökkviliðið byrjað að undirbúa áramótin. Ásgeir segir undirbúninginn fela í sér að fara yfir staðsetningar á flugeldasölum og flugeldageymslum og undirbúa áhafnir dælubíla fyrir komandi daga.