Þingnefnd um málefni Norður-Írlands krefst þess að breska ríkisstjórnin ljóstri upp nafni flugumanns breska hersins innan Írska lýðveldishersins, sem undir dulnefninu Stakeknife leiddi dauðasveit sem myrti og pyntaði tugi meinta svikara og uppljóstrara á tímum óaldarinnar í landinu. Hann rændi einnig fimmtán manns. Breska leyniþjónustan MI5 og herinn eru sögð hafa hylmt yfir ódæði mannsins áratugum saman og ekki haft stjórn á athæfi hans. Í desember kom út skýrsla byggð á níu ára rannsókn lögreglu undir heitinu Operation Kenova, sem leiddi í ljós að Stakeknife hafði gerst sekur um verstu mögulegu glæpi. Nefndin segir það almenningi verulega í hag að afhjúpa hver maðurinn er auk þess sem útsendarar sem rjúfi öll mörk geti ekki byggt upp traust um gervallt Norður-Írland í skjóli nafnleyndar. Grunur leikur á að útsendarinn hafi verið Freddie Scappaticci frá Belfast á Norður-Írlandi. Hann flúði þaðan 2003 þegar ásakanir um að hann væri Stakeknife fóru á flug. Hann viðurkenndi aðild að Írska lýðveldishernum en þvertók fyrir samstarf við bresku leyniþjónustuna. Scappaticci lést fyrir þremur árum, 77 ára að aldri. Höfundar Kenova-skýrslunnar hafa einnig hvatt stjórnvöld til að staðfesta hver Stakeknife var og fagna viðhorfi þingnefndarinnar. Átökin á Norður-Írlandi, í daglegu tali kölluð Vandræðin eða The Troubles, snerust í stuttu máli um hvort landið ætti að sameinast írska lýðveldinu eins og kaþólikkar vildu eða vera áfram undir breskri stjórn að kröfu mótmælenda. Söguna má rekja allt aftur til þriðja áratugs síðustu aldar en Vandræðin sjálf stóðu frá því seint á 7. áratugnum og til 1998 þegar þeim lauk að mestu með friðarsamkomulagi kenndu við föstudaginn langa.