Tónlistamaðurinn Bad Bunny, sem heitir réttu nafni Benito Antonio Martínez Ocasio, bauð upp á sannkallaða gleðiveislu með rómanskri sveiflu í hálfleik Ofurskálarinnar í nótt. Miikil eftirvænting er jafnan fyrir tónlistaratriðinu í úrslitaleik NFL-deildarinnar í amerískum fótbolta og var þetta ár engin undantekning. En eins og svo margt annað í Bandaríkjunum um þessar mundir var aðdragandinn þrunginn pólitískum undirtónum. Smellið hér til að sjá atriðið í heild sinni. Tónlistarmaðurinn Bad Bunny bauð upp á fölskvalausa gleði í hálfleik Ofurskálarinnar. Hann hélt rómönskum hefðum á lofti með skilaboðunum: Saman erum við Ameríka. Forseti Bandaríkjanna var ekki hrifinn. Bad Bunny er fæddur á eyjunni Puerto Rico í Karíbahafi, sem er hluti af Bandaríkjunum, en þó ekki fullgilt ríki. Hann syngur alfarið á móðurmáli sínu, spænsku, og er samkvæmnt flestum mælikvörðum vinsælasti tónlistarmaður heims. Umdeildar aðgerðir innflytjendastofnunar Bandaríkjastjórnar síðustu mánuði hafa að miklu leyti beinst að fólki af rómönskum uppruna. Bad Bunny steig inn í þau mál af krafti á dögunum þegar hann hnýtti í stjórnvöld þegar hann tók á móti Grammy-verðlaunum vestanhafs. Undirtónninn í atriðinu í nótt var hins vegar gleði og eining frekar en hörð gagnrýni á aðgerðir stjórnvalda gegn óskráðum innflytjendum. Hálfleiksatriði Ofurskálarinnar eru yfirleitt krydduð með óvæntum gestum og í nótt voru það söngkonan Lady Gaga og latínó-sjarmatröllið Ricky Martin. Martin var einmitt einn af brautryðjendum rómanskra tónlistarmanna inn í meginstraum bandaríkskrar tónlistar. Þá voru ýmis frægðarmenni í hópi dansara á vellinum, meðal annars leikarinn Pedro Pascal og tónlistarkonan Cardi B, en þau eiga bæði rómanskar rætur. „Enginn skilur orð!“ Viðbrögð Donalds Trump Bandaríkjaforseta létu ekki á sér standa. Í færslu á samfélagmiðli sínum Truth Social sagði Trump að atriði hafi verið eitt það versta frá upphafi, og móðgun við mikilleika Bandaríkjanna. Þá hafi dansatriðin verið ógeðsleg, sérstaklega fyrir börnin sem horfðu á. „Enginn skilur orð að því sem þessi gaur segir,“ sagði Trump. Það er þó orðum aukið því að um 40 milljónir íbúa Bandaríkjanna hafa spænsku að móðurmáli, samkvæmt þjóðskrá Bandaríkjanna , og enn fleiri skilja spænsku.