Fjölþættar og persónulegar deilur hafa verið innan Háskólans á Bifröst síðastliðið ár á milli stjórnenda og hluta kennaraliðsins. Hluti kennaraliðsins hefur sakað Margréti Jónsdóttur rektor um eins konar ógnarstjórn og einræðistilburði í skólanum. Þessar deilur leiddu til þess að Margrét Jónsdóttir sagði frá því í beinni útsendingu í Kastljósi í gær að hún hefði sagt starfi sínu lausu með erindi til stjórnar skólans fyrr um daginn. Í fjölmiðlum hafa deilurnar hverfst um tvær siðanefndarkærur gegn þremur starfsmönnum en samkvæmt því sem bæði Margrét og Njörður Sigurjónsson, sem verið hefur talsmaður þeirra sem hafa gagnrýnt rektor, þá snúast þær um annað og meira. Siðanefnd skólans komst að því fyrir helgi að starfsmennirnir hefðu ekki brotið siðareglur skólans. Deilurnar í skólanum hafa meðal annars snúist um verktakagreiðslur sem hluti kennara við skólann hefur fengið frá skólanum um árabil ofan á föst laun sín. Dæmi eru um að einstaka kennarar hafi drýgt árstekjur sínar um meira en 10 milljónir króna með þessum hætti. Þessar verktakagreiðslur hafa verið vegna aukakennslu, stundakennslu, til einstakra kennara skólans. Þetta verklag hefur verið viðhaft í skólanum síðastliðinn rúmlega áratug hið minnsta. Margrét segir um þetta: „Nú erum við að fullu fjármögnuð í gegnum ríkið en á þeim tíma þegar háskólinn á Bifröst var mjög illa staddur fjárhagslega þá var svona yfirvinna greidd með verktöku. Þegar þú snertir pyngjuna hjá fólki þá blossar upp ónægja. [...] Kjaraskerðing er alltaf olía á eld.” Fjallað er um starfslok Margrétar Jónsdóttur Njarðvík, deilurnar í Háskólanum á Bifröst og deilurnar í skólanum í fréttaskýringaþættinum Þetta helst. Þáttinn má hlusta á hér: Rektor Háskólans á Bifröst sagði starfi sínu lausu í gær eftir nærri mánaðarlanga gagnrýna umfjöllun um hana og stjórnarhætti hennar í fjölmiðlum. Í fyrra ákvað framkvæmdastjórn skólans að banna verktakagreiðslur til kennara sem tíðkast höfðu lengi. Verktakagreiðslur bannaðar Árið 2023 fengu tvö einkahlutafélög tveggja kennara við viðskiptafræðideild Háskólans á Bifröst til dæmis milljónir króna í verktakagreiðslur í gegnum einkahlutafélög sín. Þetta eru eignarhaldsfélög Ragnars Más Vilhjálmssonar og Haraldar Daða Ragnarssonar sem báðir eru lektorar við viðskiptafræðideild skólans. Þeir eru tveir af þeim þremur starfsmönnum sem voru kærðir til siðanefndar og svo hreinsaðir af þeim grun að hafa brotið siðareglur skólans í skrifum sínum. Þegar þessi niðurstaða lá fyrir sagði Ragnar Már að aðför stjórnenda háskólans að mannorði hans hafi verið rætin. „Síðustu mánuðir hafa verið mér afar þungbærir og ég hef þurft að ganga í gegnum ferli sem ég aldrei sá fyrir. Ég hef þurft að verja æru mína og akademískan starfsferil fyrir ótrúlega rætinni aðför að mér, knúinni áfram af eigin yfirmönnum við Háskólann á Bifröst, sem kærðu mig og kollega mína til siðanefndar skólans.“ Félag Ragnars Más heitir Bravemouse ehf. og fékk verktakagreiðslur upp á 10,2 milljónir króna þetta ár og félag Haraldar Daða Ragnarssonar heitir Ráðgjöf og stjórnun slf. og fékk það greiðslur upp á 9,8 milljónir samkvæmt heimildum fréttastofu.  Þessi félög fengu langmest greitt með þessum hætti þetta árið. Aðrir fastráðnir kennarar fengu líka greiddar verktakagreiðslur en þær voru miklu lægri. Þetta helst hafði samband við Ragnar Má Vilhjálmsson og Harald Daða Ragnarsson og bað þá um viðtal um verktakagreiðslurnar og þær deilur sem hafa verið í Háskólanum á Bifröst. Ragnar Már sagðist ekki vilja koma í viðtal. Haraldur Daði svaraði ekki beiðninni. Í fyrra ákvað framkvæmdastjórn skólans að banna kennurum að senda verktakareikninga til skólans. Í fundargerð framkvæmdastjórnar háskólans frá 7. janúar í fyrra segir meðal annars orðrétt um einn efnisliðinn: ,,Framvegis verða engar verktakagreiðslur til fastra starfsmanna.  Umframkennsla verður greidd inni í launum.” Í minnisblöðum frá skólanum kemur fram að stjórnendur háskólans hafi haft áhyggjur af þessum greiðslum þar sem þær væru dæmi um mögulega gerviverktöku. Skólinn hafði líka áhyggjur af því að Ríkisendurskoðun kynni að fetta fingur út í þessar greiðslur þar sem skólinn fær um 1200 milljónir króna frá íslenska ríkinu á hverju ári. Samkvæmt einum tölvupósti sem liggur fyrir í málinu voru 33 kennarar við skólann sem sendu verktakareikninga til skólans fyrir árið 2024. Fjölþættar skýringar á deilum Margrét Jónsdóttir segir sjálf aðspurð að deilurnar um verktakagreiðslurnar hafi skipt máli en að hún axli fulla ábyrgð á siðanefndarkærunum sem svo mikið hefur verið rætt um. „Það er hægt að vera með alls kyns skýringar á þessu máli og ég ætla ekki að fara að fría mig neinni ábyrgð á óánægjunni sem siðanefndarmálið olli og fara að segja: Þetta var þetta, þetta var hitt. Ég bara fulla ábyrgð á því að ég lét kerfið virka eins og það var. Það kallaði fram ýmsa óánægju sem hafði kraumað frá því við breyttum reglum um verktöku.“