Íslenska ríkið var sýknað af kröfu manns sem taldi sig eiga rétt á bótum vegna þess hversu lengi hann var látinn afplána sex dóma. Hann sagðist hafa verið látinn sæta rafrænu eftirliti eftir að hann hefði átt að fá reynslulausn og vildi 3,4 milljónir í bætur vegna þess miska sem þetta hefði valdið sér. Maðurinn átti að hefja afplánun vegna fimm fangelsisdóma í febrúar 2019 en fékk því frestað fram í apríl sama ár. Þá bólaði ekkert á manninum og segir í dómi um bótakröfuna að ekkert hafi heyrst frá honum fyrr en lögregla færði hann til afplánunar rúmlega tveimur árum síðar. Síðar bættist við sjötti fangelsisdómur mannsins og samkvæmt því átti hann að afplána 1.095 daga refsingu. Hann og Fangelsismálastofnun greindi á um hvenær hann ætti að fá reynslulausn. Dómari við Héraðsdóm Reykjavíkur sagði að maðurinn hefði ekki afplánað þyngri refsingu eða frelsissviptingu en hann hefði verið dæmdur til, Fangelsismálastofnun hefði þó veitt honum reynslulausn síðar en tilefni stæði til vegna rangs mats á fyrningu elstu dóma yfir honum. Þetta taldi dómari að fæli ekki í sér skaðabótaskyldu þar sem ákvörðun Fangelsismálastofnunar hefði ekki falið í sér ásetning eða stórfellt gáleysi.