Á hverjum degi eru aðstæður á bráðamóttöku Landspítala í Fossvogi svo alvarlegar að öryggi sjúklinga og starfsfólks er stefnt í bráða hættu. Hvorki er hægt að tryggja sýkingavarnir, brunavarnir né persónuvernd og spítalinn hefur verið á hæsta viðbúnaðarstigi í meira en ár án þess að heilbrigðisyfirvöld hafa brugðist við. Þetta er meðal þess sem kemur fram í ályktun 180 manna fundar starfsfólks bráðamóttökunnar sem haldinn var á Grand hótel í gær. Fundurinn var boðaður af formönnum Læknafélaga Íslands, Eflingar, Sjúkraliðafélags Íslands, Sameykis og Félags íslenskra hjúkrunarfræðinga og þar var rædd staða bráðamóttökunnar sem sögð er aldrei hafa verið verri. Sagði að réttast væri að loka deildinni Í ályktuninni segir að þáverandi landlæknir, Alma Möller sem nú er heilbrigðisráðherra, hafi staðfest í minnisblaði í júní 2022 að bráðamóttakan uppfyllti ekki faglegar kröfur vegna þrengsla, of margra sjúklinga og undirmönnunar. Vegna þessa væri hvorki hægt að tryggja öryggi sjúklinga né gæði þjónustu. Þá er vísað í orð Ölmu um að í raun væri réttast að loka deildinni, sem væri þó ekki raunhæfur kostur því hún væri sú eina sinnar tegundar á landinu. „Þessar alvarlegu yfirlýsingar landlæknis voru hunsaðar. Síðan hefur staðan ekki batnað, heldur versnað,“ segir í ályktuninni. Þar segir að yfir 100 sjúklingar séu að jafnaði vistaðir í rými sem sé hannað fyrir 36. Súrefniskútar eins og hráviðri á göngum „Einangrun er ómöguleg, órólegum eða óstöðugum sjúklingum er ekki tryggt öryggi og súrefniskútar ásamt öðrum búnaði eru eins og hráviði á göngum bráðamóttökunnar með augljósri bruna- og sprengihættu. Þetta er alvarleg öryggisógn fyrir starfsfólk og sjúklinga, og með þessum fjölda sjúklinga eru vinnuaðstæður starfsfólks fullkomlega óboðlegar,“ segir þar ennfremur. Bráðamóttakan hafi í langan tíma sinnt innlögðum sjúklingum sem ættu að vera komnir á viðeigandi legudeildir. Það sé ekki hlutverk bráðamóttökunnar að reka tvöfalda legudeild ofan á bráðaþjónustu. „Það lamar viðbragðsgetu bráðamóttökunnar og hindrar starfsfólk í að fá næði og frið til að sinna lögbundnu starfi sínu í móttöku og meðferð slasaðra og bráðveikra.“ Þá neyðist starfsfólk til að starfa við aðstæður sem gangi gegn faglegri þekkingu þess og viðurkenndum viðmiðum um góða og örugga heilbrigðisþjónustu. Hætta á slysum, ofbeldi og smiti „Starfsfólk og sjúklingar eru sett í aðstæður þar sem hætta á smiti, slysum, ofbeldi og alvarlegum afleiðingum er augljós og viðvarandi,“ segir í ályktuninni. Smit sem upp kom í desember, þegar átta starfsmenn deildarinnar greindust með berkla, undirstriki afleiðingar þess þegar sýkingavarnir og aðbúnaður sé ekki í samræmi við lög og reglur. Fundarmenn leggja fram nokkrar kröfur í ályktuninni. Að vinnustaðurinn uppfylli lög um hollustuhætti, öryggi og aðbúnað og að tafarlaust verði gripið til aðgerða enda ríki viðvarandi og versnandi neyðarástand. Við því verði að bregðast nú þegar. Þá er þess krafist að þeir aðilar sem bera lögbundna ábyrgð bregðist strax við og fylgi eftir athugasemdum, úttektum og nefndarniðurstöðum sem áður hafa komið fram: Embætti landlæknis fylgi úrbótum eftir af festu af þegar gerðu mati á aðstæðum deildarinnar. Vinnueftirlitið framkvæmi heildstæða úttekt á aðbúnaði starfsfólks og bregðist við brotum á vinnuverndarlögum. Heilbrigðiseftirlit taki út aðstæður með tilliti til hollustuhátta og smitvarna. Eldvarnaeftirlit fylgi eftir mati sínu á brunahættu vegna súrefnisbúnaðar og þrengsla. Persónuvernd kanni aðstæður með tilliti til friðhelgi og verndar sjúklinga. Heilbrigðisyfirvöld geri úttekt á skaða og dánartíðni sjúklinga með tilliti til dvalarlengdar á bráðamóttöku. „Öryggi sjúklinga og starfsfólks má ekki lengur vera fórnarkostnaður. Það er með öllu óásættanlegt að þessar aðstæður hafi verið látnar óátaldar árum saman þrátt fyrir ítrekaðar viðvaranir. Í stað loforða gerum við kröfu um úrbætur. Þeir sem fara með stjórn og eftirlit í heilbrigðiskerfinu verða að axla ábyrgð og beita völdum sínum strax,“ segir í ályktuninni.