Þremenningarnir sem voru hreinsaðir af meintum brotum á siðareglum Háskólans á Bifröst í síðustu viku hafa hótað að stefna skólanum fyrir dóm. Þau sendu háskólanum á Bifröst bréf þann 8. febrúar þar sem þau krefjast þess að fá upplýsingar um nafnlausu ábendinguna sem siðanefndarmálið gegn þeim byggir á. Þremenningarnir hóta því einnig að fara með málið til embættis umboðsmanna Alþingis. Þetta segir einn þremenninganna, Hanna Kristín Skaftadóttir: „Við vitum ekki hvaðan þessi nafnlausa ábending kemur. [...] Krafan gengur út á það að viljum að öllum gögnum og nafnleynd sé aflétt í okkar máli,“ segir hún. Í bréfinu, sem fréttastofa hefur undir höndum, segir orðrétt: „ Krafa okkar lýtur sérstaklega að afhendingu á afriti af þeirri „nafnlausu ábendingu“ sem rektor vísar til í málatilbúnaði sínum og opinberri upplýsingagjöf til starfsfólks.“ Þessi krafa þremenninganna er ein birtingarmynd þess að deilunum innan skólans er langt í frá lokið þó að þessi niðurstaða sé komin frá siðanefnd og að Margrét Jónsdóttir Njarðvík sé hætt sem rektor. Á þriðjudaginn var haldinn hitafundur í húsakynnum Bifrastar í Borgartúni þar sem tímabundinn eftirmaður Margrétar, Ólína Þorvarðardóttir, tók meðal annars til máls. Innan skólans eru ennþá stríðandi fylkingar. Þeir sem stóðu með Margréti Jónsdóttur Njarðvík annars vegar og hins vegar þeir sem gagnrýndu hana og vildu losna við hana. Fjallað er um deilurnar í Háskólanum á Bifröst og fjárhagsstöðu skólans í fréttaskýringaþættinum Þetta helst í dag. Þáttinn má hlusta á hér: Deilurnar í Háskólanum á Bifröst halda áfram þrátt fyrir starfslok rektors. Þrír kennarar við skólann sem voru kærðir til siðanefndar hóta að stefna skólanum. Bifröst hefur staðið í ströngu á liðnum árum vegna erfiðrar skuldastöðu. Um 2.3 milljarðar hafa verið afskrifaðir Háskólinn á Bifröst er sjálfseignarstofnun sem er nær alfarið fjármögnuð af íslenska ríkinu í dag. Skólinn hefur verið starfandi lengi í ólíkum myndum og er kennitala hans frá árinu 1969. Skólinn var staðsettur á Bifröst í Norðurárdal til 2024 og fór kennsla fram þar. Í dag er Bifröst fjarnámsskóli sem er með skrifstofur í Borgartúni í Reykjavík. Unnið er að því að reyna að selja skólabyggingarnar á Bifröst og hefur hluti þeirra þegar verið seldur. Skólinn fær í dag um 1200 milljóna króna fjárframlag frá ríkinu. Þrátt fyrir þessa auknu fjármögnun frá ríkinu þá er talsvert tap á skólanum. Samkvæmt heimildum var um 200 milljóna króna tap á skólanum í fyrra og er gert ráð fyrir sams konar tapi í ár, 2026. Raunar var gengið út frá því í ársreikningi skólans 2024 að tap yrði á honum í fyrra og í ár. Ástæðan er sú að fjárveitingin frá ríkinu byggir á nemendafjölda síðustu þriggja ára. Nemendafjöldinn á Bifröst jókst hins vegar aðeins verulega árið 2024 og þar á eftir og því helst fjármögnunin frá ríkinu ekki í hendur við nemendafjöldann fyrr en að þremur árum liðnum. Bifröst hefur allt frá efnahagshruninu árið 2008 átt í verulegum fjárhagserfiðleikum vegna mikillar skuldsetningar vegna fasteignauppbyggingar í Borgarfirði á árunum fyrir hrun. Þessi uppbygging var að stóru leyti fjármögnuð með lánum frá ríkisstofnuninni Íbúðasjóði. Þessi lán fluttust svo til Húsnæðis- og mannvirkjastofnunar. Húsnæðis- og mannvirkjastofnun hefur á síðustu árum afskrifað 2.3 milljarða króna skuldir hjá fasteignafélagi Háskólans á Bifröst. Þetta er félagið sem heldur utan um fasteignir háskólans í Norðurárdal í Borgarbyggð. Húsnæðis- og mannvirkjastofnun er ríkisstofnun og þar með er það íslenska ríkið sem á endanum hefur afskrifað þessar skuldir. Stofnunin var með veð í fasteignunum. Þetta kemur fram í ársreikningi fasteignafélags háskólans, Kiðá ehf., fyrir árið 2024. Í apríl í fyrra var gengið frá síðasta hluta þessa skuldauppgjörs við fasteignafélag Háskólans á Bifröst. Þá var gengið frá samkomulagi um að fasteignafélagið greiddi 570 milljónir króna upp í tæplega 1300 milljóna króna skuld Kiðár ehf. við Húsnæðis- og mannvirkjastofnun. Rúmlega 700 milljónir króna af skuldinni voru afskrifaðar. Fasteignafélag skólans tók 570 milljóna króna lán frá Arion banka til að greiða þessa upphæð upp í skuldina við ríkisstofnunina samkvæmt veðskjali. Umræddar skuldir voru að stóru leyti frá þeim tíma þegar stjórnendur Háskólans á Bifröst réðust í stórfellda uppbyggingu og húsbyggingar við skólann í Borgarfirði. Þetta var á árunum var íslenska efnahagshrunið árið 2008. Þá varð til eins konar lítið háskólaþorp á Bifröst. Síðan þá hafa þessar skuldir fasteignafélags Bifrastar verið útistandandi vandamál sem ekki hefur verið gert upp endanlega þar til í fyrra. Bifröst hafði ekki nokkra möguleika á að greiða þessar skuldir til baka. Með þessu skuldauppgjöri töldu stjórnendur Háskólans á Bifröst og Kiðár að rekstrargrundvöllur félagsins væri tryggður. Orðrétt segir um þetta í ársreikningnum: ,,Það er mat stjórnar að með fullnaðaruppgjöri við HMS verði rekstrarhæfi félagsins tryggt.”  Þau sem skrifuðu undir þessara lánapappíra voru fyrrverandi rektor skólans, Margrét Jónsdóttir Njarðvík, og stjórnarformaðurinn Ársæll Harðarson. Staðan er því sú í dag að í stað þess að skulda Húsnæðis- og mannavirkjastofnun um þrjá milljarða króna sem stökkbreyttust á mörgum árum frá efnahagshruninu þá skuldar Bifröst nú Arion banka 570 milljónir í gegnum Kiðá ehf.