Landeigendur í Reynisfjöru berjast við náttúruöflin eftir töluvert landrof í fjörunni. „Við erum að reyna að verja útsýnispallinn sem við settum hérna og skiltin og við erum búin að færa grjót úr fjörunni og setja hérna og sjá hvort að það geri eitthvað,“ segir Ívar Guðnason, bóndi og landeigandi að Reynisfjöru. „En við vitum ekkert hvort að það dugi.“ Framkvæmdirnar eru alfarið á kostnað landeigenda, sem sjá um allt viðhald. „Það er búið að grafa rosalega úr þessu og það heldur bara áfram ef ekkert er gert.“ Til þess að styrkja undirstöðurnar ferja þeir grjótið sem sjórinn færði til í austanáttinni sem hefur verið ríkjandi undanfarið. Ívar segir að stórgrýtið hafi velst um í briminu eins og smávölur. Drunurnar hafi heyrst alla leið heim að sveitabýlunum í Reynishverfi. Eins og sjá má á þessu korti hefur strandlínan í Reynisfjöru breyst töluvert undanfarið. Bláa línan sýnir hversu langt fjaran náði út í fyrra, þann 3. mars 2025. Græna línan sýnir hvar strandlengjan var fyrir einungis mánuði síðan, þann 7. janúar, og gula línan sýnir stöðuna þann 20. janúar. Rauða línan sýnir hvernig strandlínan var komin mun ofar en áður þann 7. febrúar, sérstaklega næst Reynisfjalli. Heimild: Ingibjörg Jónsdóttir, Háskóli Íslands / Sentinel 2 / Copernicus EU Vestanátt gæti breytt stöðunni Ívar segir óvíst hvort fjaran komist aftur í sama horf og áður. „Þetta eru óvenjulegar aðstæður og vonandi breytast þær en það veit enginn nema guð og lukkan.“ Hann segir það þó ekki ólíklegt. „Þetta gæti breyst á tveim dögum.“ Strandsérfræðingur telur að fjaran jafni sig þegar vindur snýst í vestanátt. Óvenju stíf austanátt hafi skapað þær aðstæður sem eru í fjörunni. „Yfirleitt er sandurinn að færast frá vestri til austurs en undanfarinn vetur hefur þetta verið öfugt, það hafa verið mun sterkari austanáttir,“ segir Sigurður Sigurðarson, strandsérfræðingur hjá Vegagerðinni. Á flestum stöðum á landinu geri það ekki mikið til. „Sandur flyst sum árin til austurs og svo til baka til vesturs, fram og til baka,“ segir Sigurður. Annað sé uppi á teningnum í Reynisfjöru. „Það fer enginn sandur vestur fyrir Reynisfjallið. Þannig að fjaran í Reynisfjöru sem er undir álagi að flytja hann til vesturs fær engan sand úr austri,“ segir Sigurður. Ekki lokað en takmarkað aðgengi meðan verið er að vinna Fjaran er ekki lokuð, en á meðan á framkvæmdum stendur er búið að strengja borða meðfram ökuleið vinnuvélanna. „Við erum að reyna að halda þeim aðeins frá vinnusvæðinu. Það gengur misvel,“ segir Ívar. „Það hefði eiginlega þurft að hafa rafmagn á honum.“ Þegar rauða ljósið blikkar á viðvörunarskiltinu má ekki fara lengra en að rauðu línunni á myndinni hér fyrir ofan. Gult ljós þýðir að einungis mætti fara að gulu línunni en áður náði ströndin eins langt og skyggða svæðið á myndinni.