Á sunnudag var tilkynnt með yfirlýsingu að sérstakt öryggisráð ísraelskra stjórnvalda hefði samþykkt aðgerðir sem gerðu yfirtöku Ísraela á palestínsku landi á Vesturbakkanum auðveldari. Þetta mætti strax andstöðu úr ýmsum áttum, meðal annars frá Sameinuðu þjóðunum, Bretlandi, Kanada, Evrópusambandinu og fjölda arabaríkja. Þá sá Hvíta húsið í Bandaríkjunum ástæðu til að árétta með yfirlýsingu andstöðu við að Ísrael innlimi Vesturbakkann. Það var ekki formaður öryggisráðsins, Benjamín Netanjahú forsætisráðherra Ísraels, sem gaf út yfirlýsinguna heldur Bezalel Smotrich fjármálaráðherra og Israel Katz utanríkisráðherra. Þetta var ekki ákveðið af ríkisstjórninni heldur téðu öryggisráði sem er fámennara og ætlað til þess að geta tekið ákvarðanir fljótt þegar hætta steðjar að. Michael Milshtein, greinandi og fyrrum sérfræðingur í málefnum Palestínu hjá Ísraelsher, segir þetta laumulega leið til þess að knýja áfram áætlun Smotrich um innlimun á Vesturbakkanum og forðast um leið átök við Donald Trump Bandaríkjaforseta fyrir opnum tjöldum. „Ég skilgreini þetta sem skref í átt að innlimun án þess að nota orðið innlimun,“ segir Milshtein við New York Times. „Við erum að festa rætur Ísraels á svæðinu og grafa hugmyndir um palestínskt ríki,“ sagði Smotrich fjármálaráðherra. Hver er Bezelel Smotrich? Smotrich er formaður Þjóðernistrúarflokksins–Trúarlegs zíonisma. Sá flokkur er einn öfgahægriflokka sem Netanjahú þarf að reiða sig á í samsteypustjórn sinni, sem er hægrisinnaðasta ríkisstjórn í sögu Ísraels. Hann er annar tveggja ráðherra sem fjöldi ríkja hefur sett á bannlista, þar á meðal Ísland, fyrir að kynda ítrekað undir ofbeldi gegn Palestínu. Smotrich býr sjálfur í ólöglegri landtökubyggð á Vesturbakkanum. Hann trúir því að gyðingar eigi rétt á öllu landsvæðinu sem samkvæmt Biblíunni myndar Ísrael. Hann er á móti hinsegin fólki og skipulagði eitt sinn mótmæli gegn gleðigöngunni. En hvað var ákveðið nákvæmlega? Ísraelsku samtökin Peace Now fjalla um málið á heimasíðu sinni. Þar segir að sú staðreynd að ákvörðunin var tekin af öryggisráðinu frekar en ríkisstjórninni í heild þýði að orðalag og skjöl tengd málinu séu trúnaðarmál. Samtökin greindu allt sem fram hefur komið og samkvæmt þeim er það eftirfarandi: Landtökufólk getur keypt land milliliðalaust . Fella á úr gildi lög sem voru sett fyrir 1967 þegar Jórdanía hafði yfirráð á Vesturbakkanum sem banna sölu á landi til annarra en Palestínumanna. Krafa um leyfi til kaupa á landi verður felld úr gildi. Þetta skref er talið mikilvægt til þess að koma í veg fyrir vafasöm eða fölsuð viðskipti. Fasteignaskrá á hernumdu svæðunum verði opinber. Landtökufólk hefur þrýst á þetta lengi. Trúnaður um eignarhald hefur gert þeim erfiðara fyrir við að ná yfirráðum á landsvæði. Ríkið kaupir land. Endurvekja á félag sem kaupir land af Palestínumönnum fyrir hönd ríkisins. Eftirlit á svæðum undir stjórn Palestínu (svæði A og B). Ísraelskar stofnanir hefja starfsemi á svæðum sem samkvæmt alþjóðasamningum eru undir stjórn Palestínumanna. Ísrael getur þá gripið til aðgerða eins og að rífa niður byggingar og koma í veg fyrir framkvæmdir Palestínumanna á öllum Vesturbakkanum, túlki ísraelsk stjórnvöld aðstæður sem svo að þess gerist þörf. Borgaryfirvöld í Hebron verða svipt skipulagsvaldi. Þetta gerir Ísrael kleift að stækka og þróa landtökubyggðir við borgina Hebron. Taka yfir svæðið við grafhýsi Rakelar. Grafhýsi Rakelar (e. Rachels Tomb) er nærri palestínsku borginni Betlehem á Vesturbakkanum. Grafhýsið hefur trúarlegt mikilvægi fyrir kristna, gyðinga og múslima. Það sama var gert í Hebron fyrir um áratug, þá var stofnuð nefnd sem fór með málefni Ísraela á svæðinu. Ef ákvarðanir öryggisráðs Ísraels ganga eftir verður töluvert auðveldara fyrir Ísrael að taka yfir enn meira landsvæði á Vesturbakkanum. Ólöglegum landtökubyggðum hefur fjölgað á ofurhraða eftir að sitjandi ríkisstjórn tók við völdum 2022. Vesturbakki Jórdan, oftast kallaður Vesturbakkinn, hefur verið undir hernámi Ísraels í áratugi eða allt frá sex daga stríðinu 1967. Til Vesturbakkans telst rúmlega 5.600 ferkílómetra svæði. Samkvæmt Óslóarsamkomulaginu er honum skipt í þrennt: Svæði A sem Palestínumenn ættu að ráða yfir. Svæði B sem Palestínumenn og Ísrael ættu að fara með sameiginlega stjórn. Svæði C sem Ísraelar ráða yfir sem er um 60 prósent af Vesturbakkanum. Það er á svæði C sem þessar ólöglegu landtökubyggðir eru aðallega, en nú gæti þeirra vel farið að gæta á hinum svæðunum. Á Vesturbakkanum og austurhluta Jerúsalem búa um 700.000 í landtökubyggðum. Íbúar þar fá ýmiss konar fríðindi, þeir greiða til dæmis lægri skatta. Landtökubyggðum fylgir líka vegakerfi, sem tengir þær við Ísrael. Palestínumenn mega ekki nota þá vegi. Ríkisstjórn Netanjahús hefur slegið vafasöm met og á meðan hefur athygli heimsins að mestu verið á blóðbaðinu á Gaza. Árið 2024 var sett met í veitingu byggingarleyfa í landtökubyggðum, metfjöldi þeirra var lögleiddur í Ísrael, metfjöldi kílómetra var lagður af vegum sem eru aðeins fyrir landtökufólk og Ísraela, ofbeldi landtökufólks gegn Palestínumönnum, eftirlitsstöðvum sem takmarka för Palestínumanna og aldrei hafa fleiri þurft að yfirgefa heimili sín frá því í sex daga stríðinu. Hér má sjá gagnvirkt kort frá International Crisis Group þar sem staðsetning landtökubyggða á Vesturbakkanum er kortlögð. Á þessu ári verða kosningar í Ísrael og fyrir Smotrich fjármálaráðherra er útlitið ekki bjart. Samkvæmt skoðanakönnunum nær flokkur hans ekki manni inn á þing. Það skal því engan undra að hann leiti allra leiða til að koma sínum kosningaloforðum á framfæri og eitt þeirra er að taka yfir Vesturbakkann.