Hópur fólks sem var vistað á vöggustofum í Reykjavík 1949-1979 hefur sent Kristrúnu Frostadóttur forsætisráðherra bréf og farið þess á leit að ríkið tryggi þeim sanngirnisbætur. Tvær rannsóknir á starfsemi Vöggustofunnar Hlíðarenda og Vöggustofu Thorvaldsensfélagsins hafa leitt í ljós slæman aðbúnað barna og alvarlegar langtímaafleiðingar vistarinnar. Davíð Þór Björgvinsson lögmaður sendi bréfið til forsætisráðherra fyrir hönd fimm manns sem dvöldu á vöggustofum og leituðu til hans. Hann segir í bréfinu að tilgangurinn sé ekki að setja fram einstaklingsbundnar kröfur heldur hvetja forsætisráðherra til að setja í gang vinnu innan stjórnsýslunnar um að tryggja sanngirnisbætur úr ríkissjóði. Hann vísar til fyrri laga um sanngirnisbætur, sem eru fallin úr gildi, og hvetur til þess að vöggustofubörn njóti jafnræðis á við börn sem fengu bætur vegna dvalar á vistheimilum og sæti að minnsta kosti ekki lakari meðferð en þau. „Hér skal áréttað að auki að leiða má að því líkur að máli hafi skipt að vistun barna á vöggustofunum var hagkvæmt félagslegt úrræði fyrir Reykjavíkurborg enda mun ódýrara að vista börnin á vöggustofum en að styrkja foreldra til að framfleyta sér og börnum sínum til langframa.“ Davíð Þór skrifar að auki að ættleiðingar vöggustofubarna hafi verið óeðlilega tíðar en með þeim hafi fallið niður allur opinber kostnaður vegna vistunar eða framfærsluaðstoðar. „Við Íslendingar verðum að horfast í augu við alla kima okkar eigin samfélags, hvort sem það heitir Bakkakot eða Vöggustofa Thorvaldsensfélagsins og koma í veg fyrir að svona nokkuð gerist ekki framar.“ Reykjavíkurborg greindi frá því í dag að samið hefði verið við Kvíðameðferðarstöðina, Sálfræðistofuna Höfðabakka og Domus Mentis geðheilsustöð um þjónustu við fólk sem vistað var á Vöggustofu Thorvaldsensfélagsins á árunum 1974-1979. Þjónustan hefst í dag klukkan tíu og geta Vöggustofubörn óskað eftir henni í síma 411-1400 eða í tölvupósti á netfangið voggustofur@reykjavik.is.