Lögmaður fólks sem vistað var á barnaheimilinu á Hjalteyri segir umbjóðendur sína skoða að leita til dómstóla til að fá greiddar bætur vegna þess tjóns sem vistin olli þeim. Lengi hafi verið beðið eftir bótunum. Fólk sem dvaldi við Hjalteyri á barnsaldri hefur lýst illri meðferð og kynferðisofbeldi af hálfu þeirra sem ráku heimilið sem var starfrækt árin 1972 til 1979. Gísli Kr. Björnsson, lögmaður fólksins, lítur svo á að ríkið hafi þegar viðurkennt bótaábyrgð í þeim frumvörpum um skaðabætur sem lögð voru fram í tíð fyrri ríkisstjórna. „Það var sagt við þau á fundum bæði í dómsmálaráðuneytinu og forsætisráðuneytinu: „Þið urðuð fyrir tjóni, við viðurkennum það. Við ætlum að leggja fram lagafrumvarp.“ Svo bara gerist ekki neitt,“ segir hann. Farið hefur verið fram á 15 milljónir í skaðabætur á mann, sem Gísli segir síst of mikið fyrir það tjón sem fólkið hafi orðið fyrir. „Við erum að tala um næstum 50 ára þrautagöngu.“ Í dag er hann í forsvari fyrir 18 manns. Í vikunni var fjallað um það að rannsóknarnefnd sem skipuð verður til að rannsaka Bakkakotsmálið muni líklega skoða önnur fósturheimili. Standi slíkt til vill Gísli að mál umbjóðenda sinna verði tekið undan þeim hatti. Hann segir að ekki sé tilefni til að skoða það nánar. „Það þarf ekki. Nú þurfum við að setjast niður og fara að semja um bætur eða ákveða að fara með málið fyrir dóm.