Չարենցավանցի Գևորգ Հակոբյանին և նրա ընկերներին վարչապետ Նիկոլ Փաշինյանի այցին ընդառաջ բերման են ենթարկել և տեղափոխել քննաչական վարչություն, բաց թողել ուշ երեկոյան. ահազանգում են տղամարդիկ: 2 ամիս առաջ Փաշինյանի մասնակցությամբ Սուրբ Փրկիչ եկեղեցում մատուցված պատարագին ընդառաջ նրանց դարձյալ բերման էին ենթարկել և բաց թողել վարչապետի գնալուց հետո։ Այն ժամանակ Հակոբյանն ու մյուսները պատրաստվում էին բողոքի ակցիա իրականացնել ու «ոչ Նիկոլ, մի քանդիր եկեղեցին, վերադարձնել անձնագրայինը և Արցախը Հայաստան է» գրությամբ թռուցիկներ բաժանել հավաքվածներին: Նրանք, սակայն, ոչ Փաշինյանին տեսան, ոչ էլ մյուս բարձրաստիճան պաշտոնյաներին, ցույցը չմեկնարկած տղամարդկանց բերման ենթարկեցին: Հակոբյանը երեկ «Ազատությանը» Քննչական կոմիտեից ստացած նամակն էր ուղարկել, որ իրեն հենց վարչապետի այցի ժամերին, ատելություն, անհանդուրժողականություն հրահրելու կամ քարոզելու դեպքով Քննչական են հրավիրել, երբ այս գործով արդեն երկու ամիս է նորություն չկար։ Իրավապահներն առայժմ գործի վերաբերյալ մանրամասներ չեն հաղորդել: