Иран му одговори на Трамп: Ако се оствари заканата, ќе ги нападнеме постројките за десалинизација Филип Здравески 22.03.2026 / 10:14 Свет Иранската војска објави дека ќе ги нападне енергетската инфраструктура и постројките за десалинизација во регионот, доколку американскиот претседател Трамп ја оствари својата закана за уништување на термоцентралите на Иран. „Доколку непријателот ја нападне нафтената и енергетската инфраструктура на Иран, целта ќе биде целата енергетска, информатичка и инфраструктура за десалинизација што им припаѓа на САД и на режимот во регионот“, изјави Хатам ал-Анбија, портпарол на оперативната команда на иранската војска. Заканата на Трамп и последиците во Израел Претходно, Трамп му даде рок од 48 часа на Иран да го отвори Ормускиот Проток или ќе се соочи со уништување на електраните. Ова доаѓа по ирански ракетни напади врз Јужен Израел во саботата навечер, кога беа погодени два града, едниот во близина на нуклеарен истражувачки центар. Повредени се повеќе од 100 лица, а предизвикана е голема материјална штета. Најмалку 88 лица беа повредени во градот Арад, од кои 10 потешко. Персискиот Залив зависи од десалинизацијата Земјите од Заливот, вклучувајќи ги и Обединетите Арапски Емирати, се во голема мера зависни од десалинизацијата – процес на претворање на морската вода во вода за пиење. Стотици постројки за десалинизација во Заливот обезбедуваат вода за пиење за околу 100 милиони луѓе. Додека Иран сè уште добива поголем дел од водата од реките и подземните води, Заливот има многу малку природни слатководни ресурси. Некои земји, како што се Кувајт, Оман и Бахреин, се потпираат на десалинизацијата за речиси целата вода за пиење. Десалинизацијата е скап процес со кој солта, минералите и нечистотиите се отстрануваат од морската вода. Водата како цел и оружје Нападот врз клучна цивилна инфраструктура е спротивен на меѓународното право. Дејвид Мишел од Центарот за стратешки и меѓународни студии предупредува дека координиран напад врз постројки за десалинизација би бил „провокативна ескалација“. Историјата покажува дека слични напади се случиле и претходно. За време на Заливската војна во 1991 година, Ирак намерно фрли стотици милиони барели нафта во Персискиот Залив, контаминирајќи ја водата што ја користат постројките за десалинизација. Кувајт потоа мораше да побара помош од Турција, Саудиска Арабија и други земји за да обезбеди снабдување со флаширана вода. Мишел рече дека во изминатата деценија е забележана „значајна ерозија на нормите“ околу нападите врз водоводната инфраструктура. Русија изврши повеќе од 100 напади врз украинската водоводна инфраструктура, а Израел уништи водоводна и санитарна инфраструктура во Газа. Ранливост и последици Постројките за десалинизација често се наоѓаат до други клучни објекти, како електрани и пристаништа. Напад врз нив би можел да предизвика прекини во снабдувањето со вода за милиони луѓе, привремено затворање на делови од економијата и значителна материјална штета. ЦИА уште во 2010 година заклучила дека нарушувањето на десалинизацијата „може да има посериозни последици од загубата на која било друга индустрија“. САД Иран Автор/Извор Макфакс Прикажи во метро On