බොරතෙල් නොමැතිකම හේතුවෙන් සපුගස්කන්ද තෙල් පිරිපහදුව ලබන අප්‍රේල් මස මැද භාගයේදී වසා දැමීමට සිදුවන බව ලංකා ඛනිජ තෙල් නීතිගත සංස්ථාවේ සභාපති ඩී.ජේ. රාජකරුණා මහතා ඊයේ ප්‍රකාශ කළේය. සභාපතිවරයා කියා සිටියේ, දැනට පවතින බොරතෙල් තොග ප්‍රමාණවත් වන්නේ අප්‍රේල් මැද දක්වා පමණක් බවයි. ටොන් 90,000 බැගින් වූ බොරතෙල් නැව්ගත කිරීම් දෙකක් අවලංගු වීම හේතුවෙන් මීළඟ බොරතෙල් නැව දිවයිනට පැමිණීමට නියමිතව ඇත්තේ ජුනි මස 19 සහ 20 යන දිනවලදී බවද ඔහු සඳහන් කළේය. විදුලි උත්පාදනය සඳහා අත්‍යවශ්‍ය වන ෆර්නස් ඔයිල් සහ නැප්තා නිපදවනු ලබන්නේ මෙම පිරිපහදුව මගින් බව පෙන්වා දුන් සභාපතිවරයා, පිරිපහදුව වසා දැමීමෙන් පසු රාත්‍රී කාලයේ විදුලි උත්පාදනය සඳහා ඩීසල් භාවිතා කිරීමට සිදුවන බව අවධාරණය කළේය. "පිරිපහදුව වසා දැමීම විදුලි උත්පාදනය සම්බන්ධයෙන් බරපතල ගැටලුවක් වනු ඇතැයි" ඔහු වැඩිදුරටත් පැවසීය. කෙසේ වෙතත්, හදිසි මිලදී ගැනීම් යටතේ ඇණවුම් කළ ෆර්නස් ඔයිල් නෞකාවක් අප්‍රේල් 12 සහ 13 යන දිනවල දිවයිනට ළඟා වීමට නියමිතය. එසේ වුවද, නැප්තා සෘජුව මිලදී ගත නොහැකි බැවින් ඒ වෙනුවට අධික පිරිවැයක් දරා ඩීසල් භාවිත කිරීමට සිදුවන බව සභාපතිවරයා පෙන්වා දුන්නේය. පවතින තත්ත්වය කළමනාකරණය කර ගැනීම සඳහා රාත්‍රී කාලයේදී අරපිරිමැස්මෙන් විදුලිය භාවිතා කරන ලෙස ඛනිජ තෙල් නීතිගත සංස්ථාව ජනතාවගෙන් ඉල්ලීමක් කරයි. අවම වශයෙන් එක් විදුලි බුබුළක් හෝ නිවා දැමීමෙන් සහ මාර්ග දෙපස ඇති දැන්වීම් පුවරු හා විදි ලාම්පු නිවා දැමීමෙන් සහය දක්වන්නේ නම් මෙම තත්ත්වය පාලනය කරගත හැකි බව සභාපතිවරයා පැවසීය. එසේ වුවද, ලබන මාසයේදී ඉන්ධන සැපයුම අඩාල වීමක් හෝ විදුලි කප්පාදුවක් සිදු කිරීමට අවශ්‍ය නොවනු ඇතැයි ද ඔහු විශ්වාසය පළ කළේය. මේ පුවත තව අයට බලන්න Facebook එකට Share කරන්න WhatsApp එකට Share කරන්න