Велигден носи четири дена одмор, но не за сите…

Велигден годинава на дел од граѓаните им носи продолжен празничен одмор од четири дена. Според календарот за 2026 година, православниот Велигден паѓа на 12 април, што значи дека за православните верници неработен е и Велики петок, 10 април, а за сите граѓани неработен е понеделник, 13 април, како втор ден Велигден. Кога на тоа ќе се додадат сабота и недела, се добива мини-одмор што практично го заокружува целиот велигденски викенд. Календарот покажува дека 2026 ќе биде година со неколку поволно распоредени празници и продолжени викенди. За сите граѓани неработни денови се 1 јануари, 7 јануари, 20 март, 13 април, 1 мај, 25 мај како пренесен неработен ден поради 24 мај што паѓа во недела, 3 август како пренесен ден за Илинден, 8 септември, 12 октомври како пренесен ден за 11 Октомври и 23 октомври. Токму затоа уште од сега многумина го гледаат календарот не само како список на датуми, туку и како план за кратки одмори во текот на годината. За верските заедници, пак, важат и дополнителни неработни денови. Кај православните, покрај понеделник 13 април, неработен е и Велики петок, 10 април. Кај католиците вториот ден на Велигден е на 6 април, додека кај муслиманските верници неработни се 20 март за Рамазан Бајрам и 27 мај за Курбан Бајрам. Тоа значи дека празничниот календар и во 2026 останува нерамномерно распоредена карта на државни и верски одмори, со неколку јасно издвоени периоди кога земјата речиси целосно забавува.

Go to News Site