Telur að hækkun veiðigjalds valdi uppsögnum þrátt fyrir milljarða hagnað

Ársfundur Samtaka fyrirtækja í sjávarútvegi fór fram í Hörpu í dag. Gunnþór Ingvason, formaður SFS og forstjóri Síldarvinnslunnar, segir stöðuna í greininni sterka en staðan á alþjóðavettvangi og hækkandi olíuverð valdi óvissu. „Það eru stríð, olíuverð hækkar upp úr öllu valdi, stríðið í Úkraínu það sér ekki fyrir endann á því. Það er óvissa í okkar ytra umhverfi og auðvitað hafa eins verið átök hérna á heimavelli líka,“ segir Gunnþór. „Ástandið í efnahagsmálum sem auðvitað að hluta til spilast út af þessum erlendu áhrifum. En fyrir sjávarútveginn þá erum við líka í mjög sterkum mörkuðum, það eru há verð, það hefur gengið vel að veiða og við erum nýbúin að ljúka mjög gjöfulli loðnuvertíð sem gekk í alla staði vel mjög vel hjá öllum,“ segir Gunnþór. Formaður Samtaka fyrirtækja í sjávarútvegi segir stöðuna í greininni sterka en óvissu vegna ástandsins á alþjóðavettvangi. Hann býst enn við uppsögnum vegna hækkunar veiðigjalda þrátt fyrir milljarða uppgjör Tveir til fjórir milljarðar í arðgreiðslur Brim skilaði 8,7 milljarða hagnaði á síðasta ári eftir skatta og gjöld samkvæmt ársuppgjöri fyrir 2025. Síldarvinnslan 8,2 milljörðum og Ísfélagið 2,8 milljörðum. Stjórn Brims hefur lagt til að rúmlega fjórir milljarðar króna verði greiddir í arð fyrir 2025. Síldarvinnslan greiðir út rúma þrjá milljarða, og Ísfélagið um 2,1 milljarð. Ekki sé hægt að setja uppsagnir og samdrátt í samhengi við hagnað og arð Gunnþór sagði fyrir tæpu ári síðan að hækkun veiðigjalda myndi meðal annars leiða til uppsagna í sjávarútvegi og að fjárfestingar yrðu stöðvaðar. Spurður hvort hægt sé að réttlæta uppsagnir vegna hækkunar veiðigjalds þegar staðan er þetta sterk segir hann fleira koma til. „Ef við skoðum uppgjörin að þá er nú ekki verið að greiða stóran hluta af hagnaði þessara félaga í arð. Og ef að sjávarútvegurinn ætti aldrei góð ár, og fara í uppsveiflu eins og hann hefur gert í gegnum tíðina, þá myndi hann aldrei vera í stakk búinn til að takast á við niðursveifluna. Þannig það er mjög erfitt að setja þetta í þetta samhengi,“ segir Gunnþór. Aukin skattheimta kalli á auknar kröfur. „Bara til að viðhalda samkeppnishæfni á erlendum mörkuðum að þá verðum við einfaldlega að bregðast við. Við náum ekki í þessa hækkanir út í verðlagið. Það er voðalega erfitt þegar fólk er að setja þetta í samhengi,“ segir hann um hagnað og mögulegar uppsagnir vegna veiðigjalda. Íslensk sjávarútvegsfyrirtæki þurfi að hafa meira fyrir hlutunum „Til þess að vera á meðal fremstu í heiminum og standast samkeppnina, við erum eyja norður í hafi og aðeins lengra frá mörkuðum, ég tel að við þurfum að hafa meira fyrir því að vera góð á erlendum mörkuðum og samkeppnishæf,“ segir Gunnþór. Þá muni áhrif hækkunar veiðigjaldsins ekki koma almennilega fram fyrr en á þessu ári. „Við erum auðvitað að sjá stórhækkuð veiðigjöld sérstaklega á einstökum tegundum í upphafi árs. Og það hafa verið töluvert af uppsögnum í sjávarútvegi eftir að þessi veiðigjöld voru samþykkt,“ segir hann. Stoðfyrirtækin hafi fyrst og fremst orðið fyrir samdrætti í fjárfestingum. „Það er mikil óvissa sett fram í aðferðafræði þessara veiðigjalda og auðvitað erum við líka að átta okkur á því hvað hvernig þau munu spilast í framtíðinni,“ segir Gunnþór.

Go to News Site