Öskjuhlíðarbolirnir opnast og í ljós kemur hvort spýturnar henta í tímamótahúsið

Fyrsta íbúðarhúsið smíðað algjörlega úr íslensku timbri rís brátt í Fljótsdal og burðarviðirnir eru úr skógi sem var felldur í Öskjuhlíð í Reykjavík. Flokka þarf timbrið vandlega og velja sterkustu spýturnar svo húsið endist vel og lengi. Í Skógarafurðum í Fljótsdal er verið að saga niður sitkagrenið fræga sem fékkst við trjáfellingar í Öskjuhlíð í fyrrasumar. Það er alltaf spennandi að kíkja inn í bolina því þá kemur í ljós hversu verðmætar spýtur fást úr trénu. Timbrið er flokkað nákvæmlega því ekki geta allar spýtur borið uppi heilt hús. Horfa eftir kvistum, sprungum og trefjaskekkju ,,Við erum ekki að horfa í útlitsgalla eða ljótar spýtur. Þær geta alveg verið flottar burðarspýtur. Þannig að núna erum við bara að sjá hvort spýtan hafi burð í það sem hún á að gera. Þá horfum við bara í kvista og sprungur. Trefjaskekkja er ekki mikið vandamál á Íslandi af því að á meðan að vaxtarskeiði trésins stendur þá er bjart allan sólarhringinn hjá okkur. Trén vaxa mjög beint upp þannig að það eru ekki miklar trefjaskekkjur hjá okkur þó það geti komið fyrir. En við erum hins vegar meira að slást við veðurskemmdir og veðurgalla. Það getur komið brestur í tré sem skilar sér þá í bresti í spýtu,” segir Bjarki Sigurðsson, framkvæmdastjóri Skógarafurða í Fljótsdal. Skógurinn sem felldur var í Öskjuhlíð verður brátt að burðarviðum í fyrsta íbúðarhúsinu sem smíðað er alfarið úr íslensku timbri. Mikil og nákvæm flokkun fer fram við að velja burðarviðina í húsið. Húsið rís í nýjum byggðakjarna í Hamborg í Fljótsdal og ef vel gengur verður annað byggt til viðbótar. Fljótsdalshreppur lætur byggja húsið og ætlar að leigja eða selja. Fljótsdælingar telja viðeigandi að fyrsta íbúðarhúsið alfarið úr íslensku timbri rísi þar enda hófst fyrsta bændaskógræktin í Fljótsdal fyrir rúmri hálfri öld. Mest af timbrinu kemur úr Fljótsdal en ekki allt. ,,Burðarvirkið er sitkagreni sem við fengum reyndar úr Öskjuhlíðinni. Svo erum við með klæðningar að utan úr íslensku lerki og notum ösp í panel innandyra. Og lerki í hurðar og glugga. Við spörum töluvert í flutninga því við þurfum bara að fara hér á milli tveggja bæja með timbrið,” segir Helgi Gíslason, sveitarstjóri í Fljótsdal. Timbrið flokkað aftur eftir þurrkun ,,Og svo eftir þurrkun þá kemur Eiríkur Þorsteinsson, Trétæknir hjá Tréráðgjöf og flokkar þetta með okkur aftur af því að það geta ýmsar sprungur og gallar komið fram við þurrkun sem við sjáum ekki núna á meðan timbrið er ferskt. Þá er það lokaflokkun og þá megum við nota það í húsið,” segir Bjarki Sigurðsson, framkvæmdastjóri Skógarafurða í Fljótsdal.

Go to News Site