හෙළ අවුරුදු කුමරිය අඩනිරුවත් කළ 'මොඩ්ල්' ජාවාරම: සංස්කෘතික අමාත්‍යාංශය අන්ධ වීද?

සිංහල සහ හින්දු අලුත් අවුරුද්දේ සංස්කෘතික අනන්‍යතාව, ශ්‍රී ලාංකේය යුවතියගේ සුන්දරත්වය, අභිමානය සහ ගෞරවය ලොවට කියාපාන ප්‍රබලතම සංකේතයක් ලෙස 'හෙළ අවුරුදු කුමරිය' හැඳින්විය හැකිය. අතීතයේදී ගමක අවුරුදු කුමරියක් වීම යනු මුළු පළාතටම පරමාදර්ශයක් මෙන්ම සෙසු තරුණියන්ගේ ගෞරවයට පාත්‍ර වූ කාරණයක් විය. එහෙත්, මෙවර අවුරුදු සමය ආරම්භ වීමටත් පෙර සිටම සමාජ මාධ්‍ය සහ විවිධ වේදිකාවන් හරහා දැකගත හැකි වූයේ එම උත්තරීතර සංස්කෘතික උරුමය සම්පූර්ණයෙන්ම විකෘති කළ ඛේදනීය තත්ත්වයකි. අවුරුද්දේ හර පද්ධතීන්ට නිසි ගෞරවයක් ලබා දෙනවා වෙනුවට, අපගේ සාම්ප්‍රදායික අවුරුදු කුමරියගේ ප්‍රතිරූපය බරපතල ලෙස විනාශ මුඛයට ඇද දමා ඇති ආකාරය පැහැදිලිවම දැකගත හැකි විය. මෙවර සංවිධානය කර තිබූ බොහෝ අවුරුදු කුමරිය තේරීමේ තරගවලදී සාම්ප්‍රදායික, සංවර ඇඳුම් පැළඳුම් වෙනුවට රාත්‍රී සමාජශාලා (Night Clubs) සිහිගන්වන ආකාරයේ අඩනිරුවත් රෙදි කැබලිවලින් සැරසුණු තරුණියන් වේදිකාවල හැසිරෙනු දක්නට ලැබුණි. ඇතැම් තරගකාරියන් අවුරුදු වේදිකාව මත නාගයින් සහ පිඹුරන් වැනි සතුන් සමඟ අශෝභන ලෙස නර්තනයේ යෙදීම නිසා අවසානයේදී නීතිය සහ අධිකරණය ඉදිරියට පවා යාමට සිදුවිය. මීට අමතරව, කුරුණෑගල ප්‍රදේශයෙන් පැමිණි බව කියමින් කෘත්‍රිම ඉංග්‍රීසි උරුවකින් අදහස් දැක්වීමට ගොස් සමාජ මාධ්‍ය තුළ දැඩි හාස්‍යයට මෙන්ම දෝෂදර්ශනයට ලක්වූ තරුණියන්ගේ හැසිරීම් හරහා ද පෙනී යන්නේ මෙම තරගවලින් මතුකරන කෘත්‍රිම සහ විකෘති ස්වභාවයයි. මෙම ඊනියා අවුරුදු කුමරිය තරගවල සැබෑ අරමුණ වන්නේ හෙළ සංස්කෘතියට ගැලපෙන යුවතියක් සෙවීම නොව, නිරූපණ ක්ෂේත්‍රයේ ජාවාරම්කරුවන්ගේ සාක්කු තර කිරීමයි. තරග සංවිධායකයින් බහුතරයකගේ සැඟවුණු ඉලක්කය වන්නේ, ජාත්‍යන්තර සහ දේශීය රූපලාවන්‍ය තරග (Pageants) සඳහා තරුණියන් බිලී බා ගැනීම සහ තම නිරූපණ පාසල් (Model Schools) වෙත සිසුවියන් බඳවා ගැනීමයි. ඉන් අනතුරුව, 'කැට්වෝක්' (Catwalk), පෙනී සිටීම්, සහ පෞරුෂ වර්ධනය යන නම්වලින් අධික මුදලක් අයකරමින් මෙම තරුණියන්ව වාණිජ අරමුණු වෙනුවෙන් සූරාකනු ලබයි. මෙය හුදෙක් නිරූපණ තරගයක් ලෙස පමණක් සිදු කරන්නේ නම් ගැටළුවක් නැතත්, ඒ සඳහා සිංහල අලුත් අවුරුද්දේ පූජනීය හරයන් මෙලෙස විකෘති කරමින් යොදා ගැනීම බරපතල ඛේදවාචකයකි. පසුගිය රජය සමයේදී අවුරුදු ගීතයක් විකෘති කළ තරුණයෙකුට එරෙහිව පවා දැඩි නීතිමය පියවර ගත් සංස්කෘතික අමාත්‍යාංශය, අද වන විට ලාංකේය කාන්තාවගේ සහ සංස්කෘතියේ ගෞරවය අමු අමුවේ කෙළෙසෙද්දී මුනිවත රැකීම දැඩි විවේචනයට ලක්ව ඇත. ජනතාව සහ සමාජ ක්‍රියාකාරීන් පෙන්වා දෙන්නේ, හෙළ බොදු සංස්කෘතියට පටහැනිව ප්‍රසිද්ධියේ සිදුකරන මෙවැනි අඩනිරුවත් රංගනයන් සහ සංස්කෘතික විකෘති කිරීම් වහාම නතර කිරීමට නව නීති සම්පාදනය කළ යුතු බවයි. සංස්කෘතික දෙපාර්තමේන්තුව, මහා සංඝරත්නය සහ විද්වතුන්ගේ සහාය ඇතිව මෙවැනි සුවිශේෂී ජාතික උත්සවවල ගෞරවය ආරක්ෂා කර ගැනීම සඳහා කඩිනමින් මැදිහත් විය යුතු බවට සමාජය පුරා ප්‍රබල හඬක් මේ වන විටත් නිර්මාණය වී තිබේ. මේ පුවත තව අයට බලන්න Facebook එකට Share කරන්න WhatsApp එකට Share කරන්න

Go to News Site