Mediamax
Երեւան։ Մեդիամաքս։ Ռուսաստանի ԱԳՆ պաշտոնական ներկայացուցիչ Մարիա Զախարովան այսօր հայտարարել է, որ Հայաստանում ընտրություններն անցել են «ընդդիմության նկատմամբ աննախադեպ ճնշումների եւ Արեւմուտքի՝ առաջին հերթին ԵՄ-ի կողմից, միջամտության մթնոլորտում»: «Նախնական արդյունքները վկայում են այն մասին, որ իր հաղթանակի մասին հայտարարած «Քաղաքացիական պայմանագիր» կուսակցությունը իշխանության մենաշնորհ չի ստացել։ Ավելին, նախորդ ընտրական փուլի համեմատ նրա աջակցությունը նկատելիորեն նվազել է։ Հայ հասարակության մեջ ակնհայտ է ռուս-հայկական կապերի համաչափ զարգացման, եվրասիական ինտեգրացիոն կառույցներում Հայաստանի հետագա մնալու լայն պահանջարկը, ինչը հայ ժողովրդին շոշափելի ու մեծ օգուտներ է բերում: Ողջ նախընտրական քարոզարշավը եւ բուն քվեարկության գործընթացն անցել են ընդդիմադիր կուսակցությունների ու շարժումների, նրանց ակտիվիստների եւ կողմնակիցների նկատմամբ հայաստանյան իշխանությունների կողմից կոշտ բռնաճնշումների մթնոլորտում։ Ճնշումների է ենթարկվել նաեւ երկրում ավանդաբար խորապես հարգված Հայ Առաքելական Եկեղեցին։ Այս ամենը Երեւանի կողմից ժողովրդավարական սկզբունքների եւ ազատ ընտրությունների անցկացման ընթացակարգերի կոպիտ ոտնահարում է։ Հատկանշական է նաեւ այն, որ ներկայիս հայաստանյան վարչակազմին բնորոշ գործելաոճով հալածանքների են ենթարկվել բացառապես այն քաղաքական ուժերը, որոնք հանդես են գալիս հանրապետության համար կենսական նշանակություն ունեցող Ռուսաստանի հետ դաշինքի ամրապնդման, եվրասիական ինտեգրմանը Հայաստանի հետագա մասնակցության օգտին՝ ներառյալ անդամակցությունը ԵԱՏՄ-ին եւ ՀԱՊԿ-ին, ինչպես նաեւ հրաժարումը դեպի Եվրամիություն տանող փակուղային կուրսից, որը թշնամական գիծ է վարում մեր երկրի դեմ։ Մոսկվայում միշտ շահագրգռված են եղել եւ կլինեն ուժեղ ու իսկապես ինքնիշխան Հայաստանով։ Հայ ժողովուրդը մեզ համար եղբայրական է, մենք նրան խաղաղություն եւ բարգավաճում ենք մաղթում։ Միեւնույն ժամանակ, անցած ընտրություններն ակնառու կերպով ցույց տվեցին, որ հայ հասարակությունը ծայրահեղ բեւեռացված է։ Նման պայմաններում՝ առանց բնակչության բոլոր շերտերի կարծիքը հաշվի առնելու Հայաստանի զարգացման ուղիների վերաբերյալ միակողմանի որոշումներ կայացնելը նշանակում է երկիրը տանել հետագա պառակտման եւ սոցիալ-տնտեսական ցնցումների։ Ակնկալում ենք, որ հայաստանյան իշխանությունները կառաջնորդվեն ազգային շահերի վրա հիմնված մոտեցումներով։ Ինչ վերաբերում է Հայաստանի հետ հարաբերություններում Մոսկվայի հետագա գծին, ապա մենք մտադիր ենք կառուցել մեր կուրսը ՝ հաշվի առնելով հայաստանյան ղեկավարության իրական քայլերը»,- ասված է Ռուսաստանի ԱԳՆ մամուլի քարտուղարի մեկնաբանության մեջ։
Go to News Site
Lurer 
NEWS.am 
MAMUL 
A1plus 
