Mediamax
Երեւան։ Մեդիամաքս։ Միջազգային դիտորդներն այսօր հրապարակել են նախնական հայտարարությունը հունիսի 7-ին Հայաստանում կայացած ընտրությունների արդյունքների վերաբերյալ: Փաստաթղթում, մասնավորապես, ասվում է, որ ընտրությունները «ընտրողներին ընձեռել են քաղաքական այլընտրանքների միջեւ իրական ընտրության կատարելու հնարավորություն՝ լավ կազմակերպված գործընթացի շրջանակներում, սակայն նախընտրական քարոզարշավի ընթացքում նկատվել է ուղղակի օտարերկրյա ճնշում՝ ուժգնացող առեւտրային սահմանափակումների եւ անվտանգային սպառնալիքների տեսքով, որոնք ուղղված են եղել ընտրողների վրա անօրինական ազդեցություն գործադրելուն՝ հօգուտ ընդդիմության»։ Ներկայացնում ենք հատվածներ այսօր Երեւանում կայացած մամուլի ասուլիսի ժամանակ հնչած հայտարարություններից: ԵԱՀԿ կարճաժամկետ դիտորդական առաքելության հատուկ համակարգող եւ ղեկավար Ֆարա Քարիմի «Ընդդիմադիր գործիչների նկատմամբ ձերբակալությունների եւ քրեական հետապնդումների կենտրոնացումը նպաստել է ընտրական արդարադատության մասին պատկերացումների ձեւավորմանը, մինչդեռ բեւեռացված մեդիադաշտը, հրահրիչ հռետորաբանությունը, ապատեղեկատվությունը եւ օտարերկրյա ճնշումներն ու միջամտությունը մարտահրավեր են նետել Հայաստանի ժողովրդավարական դիմակայունությանը եւ հանրային քննարկումների ամբողջականությանը»։ Եվրոպայի խորհրդի Խորհրդարանական Վեհաժողովի պատվիրակության ղեկավար Դամիեն Քոտիե «Հայաստանյան ընտրություններն անցել են հատկապես լարված աշխարհաքաղաքական համատեքստում՝ ուղղակի օտարերկրյա միջամտության պայմաններում։ Ռուսաստանի իշխանությունների կողմից ճնշումներն ու սպառնալիքները հասել են աննախադեպ եւ մտահոգիչ մակարդակի»։ ԵԱՀԿ Խորհրդարանական Վեհաժողովի պատվիրակության ղեկավար Եվրոզիմա Պեյովիչ «Այս ընտրությունների կարեւորությունը՝ համակցված ողջ քարոզարշավի ընթացքում տիրող բեւեռացնող հռետորաբանության հետ, լարված մթնոլորտ է ստեղծել ինչպես ընտրողների, այնպես էլ ընտրական հանձնաժողովների անդամների համար»։ Եվրոպական Խորհրդարանի պատվիրակության ղեկավար Նատալի Լուազո «Ընտրություններն ընդհանուր առմամբ անցել են խաղաղ եւ առանց միջադեպերի։ Ընտրական գործընթացը եղել է հանգիստ եւ շատ լավ կազմակերպված»։ ԵԱՀԿ ԺՀՄԻԳ առաքելության ղեկավար Յանեզ Լենարչիչ «Հայաստանի ընտրողներն օգտվեցին պրոֆեսիոնալ կերպով կազմակերպված ընտրական գործընթացի եւ աշխույժ, պլյուրալիստական, թեեւ հաճախ ծայրահեղ բեւեռացված քարոզարշավի շրջանակներում իրական ընտրություն կատարելու հնարավորությունից։ Ցավոք, նրանք ստիպված էին այս ընտրությունը կատարել աննախադեպ օտարերկրյա միջամտության եւ ճնշումների ֆոնին, որոնք դրսեւորվում էին պատժիչ առեւտրային միջոցներով եւ կախված կատարած ընտրությունից՝ հետագա բացասական հետեւանքների ամենօրյա սպառնալիքներով»։
Go to News Site
Lurer 
NEWS.am 
A1plus 
