Segir bandaríska erindreka viljuga til að vinna að friðarsamkomulag

Fréttastofa RÚV

Segir bandaríska erindreka viljuga til að vinna að friðarsamkomulag

Volodymyr Zelensky segir að hann hafi átt „jákvæð samtöl“ við Steve Witkoff og Jared Kushner. Þeir eru stjórnarerindrekar Bandaríkjanna og hafa haft milligöngu um friðarviðræður Rússa og Úkraínumanna Í tilkynningu Zelenskys á Telegram frá því í gær hrósar hann þeim Witkoff og Kushner fyrir hve viljugir þeir eru til þess að vinna að friðarsamkomulagi. Um helgina fundaði Zelensky með þjóðarleiðtogum Bretlands, Frakklands og Þýskalands í London. Þar ræddu þeir um næstu skref í friðarviðræðum og aukinn stuðning við Úkraínu. Þeir Keir Starmer, Emmanuel Macron og Friedrich Merz voru sammála um að koma ætti á fundi milli Zelenskys og Vladimírs Pútíns Rússlandsforseta til þess að þeir gætu rætt um vopnahlé milli ríkjanna. Stjórnvöld í Evrópu gætu komið þar að máli. Skilur að Íran sé í brennidepli Bandaríkjamanna Friðarviðræður milli Úkraínu og Rússlands, sem Bandaríkin hafa haft milligöngu um, hafa legið í dvala þar sem stjórnvöld í Bandaríkjunum hafa einbeitt sér að stríðinu við Íran. Zelensky sagðist í gær skilja að Íran væri í brennidepli þessa stundina. Markmiðið um frið í Evrópu væri þó engu að síður á dagskrá. Rætt um mikilvægi vopnahlés í öryggisráði SÞ Bandarískir og úkraínskir embættismenn hafa rætt um mögulega heimsókn Witkoffs og Kushners til Kyiv, jafnvel á næstu vikum. Þetta hefur Reuters eftir heimildarmönnum . Það yrði fyrsta opinbera heimsókn þeirra til Úkraínu en þeir hafa áður heimsótt Moskvu til að ræða við þarlend yfirvöld. Stríð Rússa og Úkraínumanna var rætt á sérstökum fundi í öryggisráði Sameinuðu þjóðanna í gær, þeim fimmta sem haldinn er um stríðið á 20 dögum. Þar ræddu fulltrúar frá Evrópusambandinu, Bandaríkjunum og Kína, meðal annarra, um mikilvægi þess að vopnahléi verði náð.

Go to News Site

Google Play

App Store