Fréttastofa RÚV

WhatsApp X (Twitter) Facebook Telegram Link

Lögregla dró upp rafbyssu eftir tilkynningu um innbrot

Lögreglan á höfuðborgarsvæðinu dró rafbyssu úr slíðri og beindi henni gegn einum þegar hún sinnti innbrotstilkynningu. Ekki þurfti að beita vopninu. Þetta kemur fram í dagbók lögreglu þar sem farið er yfir verkefnin frá því klukkan 17 í gær til klukkan 5 í morgun. Þar segir að tilkynning hafi borist á lögreglustöð 2 um yfirstandandi innbrot. Sú stöð sinnir verkefnum í Hafnarfirði og Garðabæ. Í tilkynningu sagði að fólk væri að reyna að komast inn til tilkynnanda. „Lögregla mætti á vettvang og kom að aðilunum, dró rafvarnarvopn og beindi að einum aðila á vettvangi en þurfti ekki að beita vopninu. Vettvangur tryggður og var ekki um innbrot að ræða, reyndist tilkynnandi eftirlýstur og var hann færður til skýrslutöku eftir að búið var að leysa málið á vettvangi,“ segir í dagbók lögreglu. Stöð 3, sem sinnir verkefnum í Kópavogi og Breiðholti, var tilkynnt um umferðarslys þar sem ökumaður yfirgaf bílinn og flúði vettvang. Lögregluþjónar höfðu uppi á manninum sem virtist mjög ölvaður. Hann var handtekinn eftir að hafa neitað að blása í áfengismæli.

Google Play App Store