Fréttastofa RÚV

WhatsApp X (Twitter) Facebook Telegram Link

Fólki í efsta skattþrepi fækkaði milli ára

Landsmenn greiddu samtals 346 milljarða króna í tekjuskatt til ríkisins og 417 milljarða í útsvar til sveitarfélaga á síðasta ári, samkvæmt samantekt fjármála- og efnahagsráðuneytisins. Tekjuskatts- og útsvarsstofn hækkaði um 8,4 prósent milli ára. Laun og hlunnindi hækkuðu um 7,4 prósent, greiðslur frá lífeyrissjóðum um 11,8 prósent og greiðslur frá Tryggingastofnun um 12,3 prósent. Atvinnuleysisbætur hækkuðu um 20,2 prósent milli ára. Rúmlega helmingur framteljenda, 53,3 prósent, greiddi skatt í fyrsta og lægsta skattþrepinu. 41,9 prósent greiddu tekjuskatt í öðru þrepi og 4,8 prósent í efsta skattþrepinu. Ríflega sextán þúsund greiddu skatt í efsta skattþrepinu á síðasta ári. Þeim fækkaði um 1.700 milli ára. Hver eru skattþrepin? Staðgreiðsla skatta af launatekjum er reiknuð út frá þremur skattþrepum, eftir því hversu háar tekjur fólk hefur. Þeim er svo lýst á vef Skattsins: „Skatthlutfall í staðgreiðslu samanstendur annarsvegar af tekjuskatti og hins vegar meðalútsvari (14,94%). Skatthlutfallið er 31,49% af tekjum 0 - 498.122 kr. (þar af 16,55% tekjuskattur) 37,99% af tekjum 498.123 - 1.398.450 kr. (þar af 23,05% tekjuskattur) 46,29% af tekjum yfir 1.398.450 (þar af 31,35% tekjuskattur) Skatthlutfall barna, þ.e. þeirra sem fædd eru 2011 eða síðar, er 6% (4% tekjuskattur, 2% útsvar) af tekjum umfram frítekjumark barna sem er 300.000 kr.“ Fólk nýtti 24 milljarða króna af séreignasparnaði til útborgunar á fyrstu fasteign eða til að greiða niður höfuðstól fasteignalána. Framteljendur á aldrinum 25 til 67 voru með 791.600 krónur í mánaðarlaun að meðaltali. Tekjuhæsti fjórðungurinn var með 973.900 krónur í mánaðarlaun að meðaltali og tekjulægsti fjórðungurinn með 487.300 krónur. Tæplega fjórðungur skattgreiðenda er með erlent ríkisfang. Fjármagnstekjur jukust um þrjú prósent milli ára og voru 355 milljarðar króna. Þær skiptust á 255.600 krónur.

Google Play App Store