Independent Urdu

WhatsApp X (Twitter) Facebook Telegram Link

پچھلے سال 10 ہزار پاکستانیوں نے سٹڈی ویزوں کا غلط استعمال کیا: ایف آئی اے

پاکستان کے وفاقی تحقیقاتی ادارے (ایف آئی اے) نے انکشاف کیا ہے کہ 2025 کے دوران 10 ہزار سے زائد ویزوں کے غلط استعمال کے واقعات رپورٹ ہوئے، جن میں سٹڈی اور وزٹ ویزوں کے ذریعے غیر قانونی طور پر یورپ جانے کی کوششیں شامل ہیں۔ یہ انکشاف منگل کو قومی اسمبلی کی قائمہ کمیٹی برائے داخلہ کے اجلاس میں کیا گیا، جہاں ڈائریکٹر جنرل ایف آئی اے عثمان انور نے انسانی سمگلنگ اور مسافروں کو آف لوڈ کیے جانے سے متعلق بریفنگ دی۔ ڈی جی ایف آئی اے نے بتایا کہ دبئی، کمبوڈیا اور ملائیشیا کے راستے پاکستانی شہریوں کو غیر قانونی طور پر یورپ پہنچانے کا ایک منظم نیٹ ورک سرگرم ہے۔ انہوں نے کہا کہ بعض افراد تھائی لینڈ کے وزٹ ویزے پر سفر کر کے بعد ازاں کمبوڈیا کی سرحد عبور کرتے ہیں جبکہ سائپرس میں انگریزی زبان کے کورسز کی آڑ میں جانے والے بعض طلبہ بعد میں یورپ منتقل ہو جاتے ہیں۔ ان کے مطابق سٹڈی ویزوں کے غلط استعمال کے باعث متعدد ممالک نے اپنی ویزا پالیسیوں پر نظرثانی شروع کر دی ہے اور بنگلہ دیش نے پاکستانی شہریوں کے لیے سٹڈی ویزا پالیسی کو محدود کر دیا ہے۔ بریفنگ کے دوران بتایا گیا کہ لیبیا سے 175 پاکستانی شہریوں کو گرفتار کرکے واپس پاکستان بھجوایا گیا اور کمبوڈیا کی حکومت نے بھی پاکستانی شہریوں کی گرفتاریوں سے متعلق آگاہ کیا ہے۔ عثمان انور نے کہا کہ گجرات اور منڈی بہاؤالدین انسانی سمگلنگ کے نیٹ ورکس سے متاثرہ اضلاع میں شامل ہیں اور اس رجحان کی نگرانی کے لیے ہر 15 روز بعد صورتحال رپورٹ مرتب کی جاتی ہے۔ انہوں نے مزید بتایا کہ 2025 کے دوران مجموعی طور پر 39 ہزار 786 مسافروں کو مختلف وجوہات کی بنا پر آف لوڈ کیا گیا۔ ان میں سے 20 ہزار 408 مسافروں کو مطلوبہ سفری دستاویزات مکمل نہ ہونے پر روکا گیا جبکہ 12 ہزار 673 افراد کو مشکوک سفری پیٹرن یا ہائی رسک مقامات کے باعث سفر کی اجازت نہیں دی گئی۔ مزید پڑھ اس سیکشن میں متعلقہ حوالہ پوائنٹس شامل ہیں (Related Nodes field) ڈی جی ایف آئی اے کے مطابق تین ہزار 450 افراد کو سٹاپ لسٹ یا انٹرپول ریکارڈ کی بنیاد پر آف لوڈ کیا گیا، 505 مسافروں کو غلط سفری روٹ اختیار کرنے پر روکا گیا۔ اسی طرح 281 افراد جعلی دستاویزات استعمال کرنے کے الزام میں آف لوڈ کیے گئے، 176 مسافروں کو غیر معمولی سفری ریکارڈ کی بنیاد پر روکا گیا اور 145 کیسز میں ویزا، پروٹیکٹر اور دیگر سفری دستاویزات کی مزید تصدیق ضروری قرار دی گئی۔ بریفنگ کے مطابق 258 کم عمر مسافروں کو سفری خدشات کے پیش نظر آف لوڈ کیا گیا اور 24 افراد کو وزٹ ویزے پر بیرون ملک ملازمت تلاش کرنے کے شبے میں سفر سے روک دیا گیا۔ اجلاس کو بتایا گیا کہ یورپی یونین اور اٹلی نے پاکستان سے غیر قانونی امیگریشن کے معاملے پر شدید تحفظات کا اظہار کیا ہے۔ بریفنگ کے مطابق بیلاروس سے پولینڈ میں غیر قانونی بارڈر کراسنگ کے واقعات پر بھی یورپی یونین نے تشویش ظاہر کی ہے جبکہ 580 پاکستانی شہری بیلاروس جانے کے بعد واپس نہیں لوٹے۔ ایف آئی اے کے مطابق برطانیہ کے لیے سٹڈی ویزے حاصل کرنے والے تقریباً 10 ہزار پاکستانیوں نے ویزوں کا غلط استعمال کیا، جس کے باعث مختلف ممالک اپنی امیگریشن اور ویزا پالیسیوں کا ازسرنو جائزہ لے رہے ہیں۔ اجلاس کے دوران وزیر مملکت برائے داخلہ سینیٹر طلال چوہدری نے کہا کہ یورپ اور امریکہ کے اعداد و شمار کے مطابق پاکستانی شہریوں کی جانب سے غیر قانونی امیگریشن میں 47 فیصد کمی آئی ہے۔ ایف آئی اے امیگریشن ویزا ایف آئی اے نے انکشاف کیا ہے کہ 2025 کے دوران 10 ہزار سے زائد ویزوں کے غلط استعمال کے واقعات رپورٹ ہوئے۔ قرۃ العین شیرازی منگل, جون 9, 2026 - 18:15 Main image: سات مئی، 2025 کو کراچی میں تمام اندرون اور بیرونِ ملک پروازیں منسوخ ہونے کے بعد جناح انٹرنیشنل ایئرپورٹ کے باہر مسافر انتظار کر رہے ہیں (اے ایف پی) پاکستان type: news related nodes: شناختی کارڈ سمیت دستاویزات کی رپورٹ گھر بیٹھے کیسے کریں؟ پاکستان سمیت 75 ممالک کے لیے امریکی امیگرنٹ ویزا معطل برطانیہ اے ٹی ایم نہیں: غلامی کا ہرجانہ مانگنے والے ممالک کے ویزے بند کرنے کا منصوبہ برطانیہ کے افغانستان سمیت چار ملکوں کے لیے تعلیمی ویزے بند SEO Title: پچھلے سال 10 ہزار پاکستانیوں نے سٹڈی ویزوں کا غلط استعمال کیا: ایف آئی اے copyright: show related homepage: Show on Homepage

Google Play App Store