Fréttastofa RÚV

WhatsApp X (Twitter) Facebook Telegram Link

Leigusalar leiti til Húseigandafélagsins í hverri viku vegna vangoldinnar leigu

Í hverri viku er leitað til húseigandafélagsins vegna vangoldinnar leigu. Þetta segir Hildur Ýr Viðarsdóttir, formaður félagsins. Hún telur þróunina tengjast versnandi fjárhagsstöðu fólks. „Við erum að rekja það til þess að það sé farið að þrengja að í samfélaginu og þess að fleiri og fleiri hafa ekki efni á að borga leigu. Þá leita leigusalarnir til félagsins um úrræði til að bregðast við þeirri stöðu.“ Leigusalar geti sent skriflega greiðsluáskorun greiði leigjandi ekki leigu fyrir gjalddaga. Berist greiðslan ekki innan sjö daga geti leigjandi rift leigusamningnum. „En þá er ekki þar með sagt, þó að það sé búið að rifta leigusamningnum, að leigjandinn sé þá að fara út úr henni. Ef hann þrásitur eignina og er í henni áfram þá þarf leigusalinn að leita leiða til að fá leigjandann borinn út.“ Getur verið vandkvæðum bundið að nota leiguveitur Það geti verið tímafrekt ferli í gegnum héraðsdómstóla og sýslumann. Á meðan verði húseigendur af leigutekjunum. Húseigendafélagið mælist til þess að leigusalar sendi skriflega greiðsluáskorun strax til að geta sýnt fram á að leigunnar hafi verið krafist með formlegum hætti. „Þetta eru náttúrulega ömurlegar aðstæður fyrir alla, leigjendur og leigusala, þegar svona er í pottinn búið,“ segir Hildur Ýr. Hún varar við því að fólk treysti alfarið á að leiguveitur sem haldi utan um leigusamninga. „Það hefur verið vandamál í framkvæmd undanfarið, eftir að það varð skylt að skrá alla leigusamninga hjá Húsnæðis- og mannvirkjastofnun. Þá eru fyrirtæki sem gefa sig út fyrir það að gera leigusamninga fyrir leigusala og senda svona áskoranir ef leiga er ekki greidd og riftunaryfirlýsingar. En það hefur verið í einhverjum tilvikum vandamál að fá það staðfest frá þessum fyrirtækjum að slíkar áskoranir hafi verið sendar og þá er leigusalinn bara á byrjunarreit.“ Tryggingin dugi oft ekki til Leigusali sem fréttastofa ræddi við á dögunum lýsti upplifun sinni af útleigu á íbúð sinni og sagði farir sínar ekki sléttar. Leigjandi hans hafi hætt að greiða leigu og neitað að fara. Félagsþjónusta Reykjavíkurborgar lagði út tveggja mánaða tryggingu fyrir konuna er hún tók íbúðina á leigu, en firrti sig að sögn leigusalans frekari ábyrgð. Leigjandinn hafi dvalið í eigninni í sex mánuði án þess að greiða krónu fyrir og talsverðar skemmdir á henni þegar hún loksins yfirgaf íbúðina. Hildur Ýr segir Húseigandafélagið þekkja slík dæmi þar sem tryggingar dugi ekki til fyrir leigumissinum og skemmdum á eignum. „Það hafa komið einstaklingar þar sem hefur verið trygging, sem hefur bara verið tveir mánuðir og svo bara ekki dugað til. Oft tekur þá lengri tíma að fá fólk út og ef það eru einhverjar skemmdir á eigninni eða eitthvað slíkt þá dugar tryggingin heldur ekkert fyrir því“

Google Play App Store