වෙනිසියුලාව, ඉරානය හරි... දැන් කියුබාවේ හමුදා මෙහෙයුම් අරඹනවා - ට‍්‍රම්ප්

ඇමරිකානු හමුදා වෙනිසියුලාව සහ ඉරානය තුළ ලැබූ සාර්ථකත්වය පිළිබඳව අදහස් දක්වමින්, ඇමරිකානු ජනාධිපති ඩොනල්ඩ් ට්‍රම්ප් ප්‍රකාශ කළේ තම රජයේ මීළඟ අවධානය කියුබාව වෙත යොමු වන බවයි. මියාමි නුවර පැවැති ආයෝජන සමුළුවක් අමතමින් ජනාධිපතිවරයා මේ බව සඳහන් කළේය. කියුබාව සම්බන්ධයෙන් ක්‍රියාත්මක කිරීමට බලාපොරොත්තු වන නිශ්චිත සැලසුම් මොනවාදැයි ඔහු එහිදී විස්තරාත්මකව අනාවරණය නොකළද, දැඩි ආර්ථික අර්බුදයකට මුහුණ දී සිටින හවානා පාලනය මේ වන විට බිඳවැටීමේ අද්දර සිටින බව ඔහු අවධාරණය කළේය. පසුගිය සති කිහිපය තුළ ට්‍රම්ප් පරිපාලනය කියුබානු නායකත්වයේ ඇතැම් පාර්ශව සමඟ සාකච්ඡා ආරම්භ කර ඇති අතර, ජනාධිපතිවරයා ඉඟි කළේ අවශ්‍ය වුවහොත් හමුදාමය ක්‍රියාමාර්ගයකට වුවද තමන් සූදානම් බවයි. "මම ඉතා ප්‍රබල හමුදාවක් ගොඩනැඟුවා. එය කිසිදා භාවිතා කිරීමට අවශ්‍ය නොවනු ඇතැයි මම පැවසුවත්, ඇතැම් අවස්ථාවලදී අපට එය භාවිතා කිරීමට සිදු වෙනවා. ඒ අනුව ඊළඟට කියුබාව ගැන බැලීමට සිදු වේවි," යනුවෙන් ට්‍රම්ප් මහතා එහිදී පැවසීය. කෙසේ වෙතත්, සිය ප්‍රකාශයෙන් අනතුරුව උපහාසාත්මක ස්වරූපයෙන් ඔහු සඳහන් කළේ, "නමුත් මම එවැන්නක් ප්‍රකාශ කළේ නැතැයි සිතන්න" යනුවෙනි. විභව හමුදාමය ගැටුමක් වළක්වා ගැනීම සඳහා තම රජය ඇමරිකා එක්සත් ජනපදය සමඟ සාකච්ඡා පවත්වමින් සිටින බව කියුබානු ජනාධිපති මිගෙල් ඩයස්-කැනෙල් පිළිගෙන තිබේ. කියුබාවේ විදුලි බලාගාර සහ ප්‍රවාහන ක්ෂේත්‍රයට අත්‍යවශ්‍ය වන තෙල් ආනයනය අඩාල වීම හේතුවෙන් එරට ආර්ථිකය මේ වන විට දැඩි පසුබෑමකට ලක්ව ඇත. මීට පෙර කියුබාවේ ප්‍රධාන තෙල් සැපයුම්කරු වූයේ වෙනිසියුලාවයි. නමුත් පසුගිය ජනවාරි මාසයේදී එවකට සිටි වෙනිසියුලානු නායක නිකොලස් මදුරෝ බලයෙන් පහ කිරීමට ඇමරිකාව දියත් කළ මෙහෙයුමෙන් පසු, එරට නව රජය වොෂින්ටනයේ බලපෑම මත කියුබාව වෙත තෙල් සැපයීම අත්හිටුවා තිබේ. මාර්තු මස මුලදී ද අදහස් දක්වමින් ට්‍රම්ප් පවසා තිබුණේ කියුබාව "මිත්‍රශීලී අත්පත් කර ගැනීමකට" යටත් විය හැකි බවත්, එය ඇතැම් විට මිත්‍රශීලී නොවන මුහුණුවරක් ද ගත හැකි බවත්ය. මේ පුවත තව අයට බලන්න Facebook එකට Share කරන්න WhatsApp එකට Share කරන්න

Go to News Site