Fréttastofa RÚV
Depurð, sorg, grátur, kvíði, vanlíðan, heift, óviðunandi ástand og hnútur í maganum, eru meðal þeirra orða sem starfsfólk Háskólans á Bifröst notar til að lýsa líðan sinni í febrúar og mars. Mjög mörgum finnst algjört rof hafa orðið á trausti auk þess sem röð mistaka hafi orðið, sem hægt hefði verið að koma í veg fyrir. Þetta kemur fram í úttekt á starfsumhverfi Háskólans á Bifröst sem mannauðs- og stjórnendaráðgjöfin Auka gerði. Skýrslan, sem fréttastofa hefur undir höndum, var unnin út frá samtölum við 69 starfsmenn skólans frá 10. febrúar til 3. mars eftir þá ólgu sem skapaðist vegna svokallaðs siðanefndarmáls við skólann. Margt starfsfólk segist hafa átt erfitt með að sinna starfi sínu eftir að málið kom upp og segist finna til óöryggis. Margir hafa áhyggjur af framtíð skólans. „Skýrt kom fram í samtölunum að nánast öllu starfsfólki hefði ekki liðið vel undanfarna daga og vikur, örfáir segjast ekki hafa upplifað vanlíðan,“ segir í skýrslunni. Orsakir slæmrar líðanar segir starfsfólk meðal annars vera siðanefndarmálið, fjölmiðlaumfjöllun og stjórnunarhættir við skólann. Gjá, sem ekki hafi verið til staðar áður, hafi myndast milli starfsfólks vegna siðanefndarmálsins. Vantrauststillaga og afsögn rektors Siðanefndarmálið rataði í fjölmiðla í janúar og hverfðist um að þrír fræðimenn við skólann voru sakaðir um að vera ranglega skráðir meðhöfundar að tveimur fræðigreinum. Siðanefnd skólans tók þetta til skoðunar og hreinsaði hún fræðimennina af öllum ásökunum. Félag akademískra starfsmanna við Háskólann á Bifröst lýsti vantrausti á Margréti Jónsdóttur Njarðvík rektor skólans og tvo aðra stjórnendur vegna þess hvernig staðið var að meðferð málsins. Margrét sagði af sér í febrúar. Vantrauststillaga stóð þó á Guðrúnu Johnsen deildarforseta viðskiptafræðideildar og Kasper Kristensen rannsóknastjóra. Í úttektinni á líðan starfsfólks segir að margir hafi lýst yfir létti þegar rektor ákvað að segja af sér. Málið hafi verið komið á þann stað að erfitt hefði verið fyrir hana að halda áfram. Margt starfsfólk segir þó óljóst á hverju endurvakið vantraust á Guðrúnu og Kasper byggist. Starfsmenn segjast bera traust til Ólínu Kjerúlf Þorvarðardóttur, setts rektors. Heyrðu af vantrausti í fjölmiðlum Sumir starfsmenn hafa áhyggjur af því að fjölmiðlaumfjöllunin hafi skaðað orðspor skólans verulega. „Margir upplifðu mikla vanlíðan við að frétta um vantraustsyfirlýsinguna fyrst í fjölmiðlum og nefndu mikla streitu í því sambandi því þau vissu ekki hvað kæmi næst,“ segir í úttektinni. Sumir lýsa yfir óánægju með að umfjöllun fjölmiðla um mál skólans hafi verið með þeim hætti að vantrauststillagan hafi komið frá öllu starfsfólki en flestir vilji halda áfram að vinna vinnuna sína og vera haldið utan við málið. Þá eru margir reiðir yfir því að ekki hafi verið gengið lengra í að leysa mikla óánægju innanhúss. Þau sem fóru með málið í fjölmiðla segist ekki hafa átt annarra kosta völ. Ekki hafi verið gefið færi á að ræða málið innanhúss. „Margir voru ósáttir við að hafa verið nánast þvingaðir til að taka afstöðu í málinu. Reynt hefur verið að draga fólk inn í þetta mál sem vill ekki taka afstöðu. Þá var nefnt að um valdabaráttu á milli hópa væri að ræða sem þau vildu ekki taka þátt í.“ Röð mistaka í siðanefndarmáli Stór hluti starfsfólks telur að siðanefndarmálið hefði aldrei átt að fara eins langt og það gerði. Röð mistaka hefði verið gerð í meðferð þess og fyrr hefði mátt bregðast við. „Margir vilja meina að siðanefndarmálið hafi bara verið toppurinn á ísjakanum, margt hafi ekki verið í lagi í starfsemi skólans. Margt starfsfólk telur að sá hópur sem gekk hvað lengst fram í þessu máli hafi gengið allt of langt og farið offari í sinni baráttu.“ Margir vilja endurskoðun stjórnunarhátta við skólann, óháð afstöðu sinni til afsagnar Margrétar. Oft var nefnt að skortur hefði verið á gegnsæi í stjórnun, lítill fyrirsjáanleiki í skipulagi og ákvarðanatöku og lítið samráð við starfsfólk. „Nefnir margt starfsfólk að þær breytingar sem hafa verið undanfarin ár séu jákvæðar fyrir skólann en þær hafi verið of miklar og of örar. Upplifunin er sú að lítið samtal eða upplýsingagjöf er um breytingar.“ Algjört rof á trausti „Allt starfsfólk telur að traust hafi minnkað á vinnustaðnum, mjög margir upplifa að algjört rof hafi orðið á trausti,“ segir í úttektinni. Flestir treysta ekki stjórn skólans og gildandi vantrauststillaga á tvo starfsmenn hefur áhrif á traust gagnvart þeim sem koma þar að máli. Hluti akademískra starfsmanna lýsir dvínandi trausti milli sín og æðstu stjórnenda undanfarin ár sem hafi ágerst síðastliðið eitt og hálft ár. Er í því samhengi nefnd mikil starfsmannavelta, skortur á gagnsæi og lítill fyrirsjáanleiki á skipulagi og ákvörðunum. Fólk segir erfitt að starfa þegar vantraust ríkir á vinnustaðnum. „Margir tala um óstarfhæfa viðskiptafræðideild. Fólk hefur sakað hvort annað um að ljúga í tengslum við siðanefndarmálið og margt starfsfólk áttar sig ekki á hvað er í gangi. Eins og fyrr segir hefur stór hópur starfsfólks kosið að taka ekki afstöðu til málsins og það hefur haft áhrif á traust.“ Enn djúpstæður ágreiningur Til að breyta ástandinu segir starfsfólk að ljúka þurfi siðanefndarmálinu og breyta stjórnunarháttum. Enn sé djúpstæður ágreiningur milli fólks sem þurfi að ráða bót á. „Mörgum finnst mikilvægt að fólk verði látið bera ábyrgð á sínum gjörðum, það þurfi að vera afleiðingar fyrir þá sem gengu of langt,“ segir í úttektinni. Þá þurfi að þjappa hópnum betur saman og styrkja ímynd skólans. Mat margra sé að skólinn hafi fallið á atriðum sem kennd eru við hann, til dæmis sáttamiðlun, krísustjórnun og áfallastjórnun. Skýrsluhöfundar leggja meðal annars til við stjórn að auka upplýsingagjöf til muna, ljúka siðanefndarmálinu og móta aðgerðir til að bæta starfsumhverfi skólans. Þá þurfi að skýra betur hlutverk og ábyrgð í stjórnskipulagi og byggja upp traust.
Go to News Site