Fréttastofa RÚV
Ríkjandi Íslandsmeistarar Hauka tóku á móti Stjörnunni á Ásvöllum í kvöld. Fyrsti leikhluti var fremur jafn en þrjú stig skildi milli liðanna að honum loknum, 24-21. Haukar spóluðu fram úr Stjörnunni í öðrum leikhluta og höfðu 22 stiga forskot í hálfleik, 57-35. Snemma í þriðja leikhluta kom Amandine Toi Haukum 27 stigum yfir með þriggja stiga körfu, 67-40. Stjörnukonum tókst að laga stöðuna og ellefu stigum munaði fyrir síðasta fjórðunginn, 86-75. Stjarnan spilaði vel í fjórða leikhluta og fjör færðist í leikinn. Forskotið sem Hafnfirðingar höfðu þegar kom þeim þó langt því loks unnu Haukar sex stiga sigur, 106-100. Haukar leiða einvígið 1-0 en vinna þarf þrjá leiki til að komast í undanúrslit. Njarðvík með sigur á heimavelli Þá heimsótti Tindastóll Njarðvík þar sem heimakonur reyndust seigari. Jafnt var að loknum fyrsta leikhluta, 26-26, en þaðan höfðu Njarðvíkingar frumkvæðið. Loks voru það sex stig sem skildu liðin að við leikslok, Njarðvík í vil, 103-97. Liðin mætast aftur á föstudag.
Go to News Site