Ísraelska þingið samþykkir frumvarp sem heimilar aftöku palestínskra fanga

Ísraelsk stjórnvöld hafa samþykkt frumvarp að lögum sem heimila dauðarefsingu yfir palestínskum föngum sem dæmdir hafa verið fyrir hryðjuverk. 62 þingmenn ísraelska þingsins, þar á meðal Benjamin Netanyahu, greiddu atkvæði með frumvarpinu en 48 þingmenn á móti. Frumvarpið er umdeilt og hefur ákvörðunin um samþykki þess þegar verið kærð til dómstóla. Frumvarpið myndi gera dauðarefsingu að sjálfgefinni refsingu fyrir Palestínumenn á hernumda Vesturbakkanum sem eru fundnir sekir um að hafa af ásettu ráði framið mannskæðar árásir sem ísraelskir dómstólar flokka sem hryðjuverk. Mál Palestínumanna á Vesturbakkanum eru sjálfkrafa tekin fyrir af ísraelskum herdómstólum. Í frumvarpinu segir að við sérstakar aðstæður megi milda dóminn í lífstíðardóm. Frumvarpið kveður á um að aftökuaðferðin skuli vera henging og að hún skuli fara fram innan 90 daga frá dómsuppkvaðningu. Frumvarpið var baráttumál Itamars Ben-Gvir, þjóðaröryggisráðherra Ísraels. Ben-Gvir er leiðtogi stjórnmálaflokks á jaðarhægrikanti ísraleskra stjórnmála. Bandaríkin styðja frumvarpið en aðrar þjóðir gagnrýna það Stjórnvöld í Bandaríkjunum hafa lýst yfir stuðningi við frumvarpið. Upplýsingafulltrúi bandaríska utanríkisráðuneytisins sagði í kvöld að Bandaríkin virði rétt Ísraels til að ákveða sín eigin lög og refsingar gegn einstaklingum sem verða dæmdir fyrir hryðjuverk. Ýmis mannréttindasamtök og nokkrar Evrópuþjóðir hafa gagnrýnt frumvarpið. Stjórnvöld í Bretlandi, Frakklandi, Þýskalandi og Ítalíu hafa áhyggjur af því að frumvarpið grafi undan skuldbindingum Ísraels við lýðræðisleg grundvallaratriði.

Go to News Site