ԵՄ քաղաքացիական առաքելության նոր ղեկավարը ստանձնել է պաշտոնը

Երեւան: Մեդիամաքս: Հայաստանի վարչապետ Նիկոլ Փաշինյանն եւ Հայաստանում Եվրոպական միության քաղաքացիական առաքելության նորանշանակ ղեկավար Սատու Կոյվուն քննարկել են Հայաստանի եւ Ադրբեջանի միջեւ խաղաղության հաստատմանը եւ տարածաշրջանում կայունության ապահովմանը վերաբերող հարցեր: Նիկոլ Փաշինյանը կարեւորել է ԵՄ քաղաքացիական առաքելության գործունեությունը Հայաստանում եւ ասել է, որ «ՀՀ–ԵՄ հարաբերությունները զարգացման դինամիկ բնույթ ունեն»։ 2026թ. փետրվարի 17-ին ԵՄ Խորհուրդը ֆինլանդացի ոստիկան Սատու Կոյվուին նշանակել էր Հայաստանում Եվրոպական միության առաքելության (EUMA) նոր ղեկավարի պաշտոնում: EUMA-ն Հայաստանում տեղակայվել է 2023 թվականին փետրվարին՝ ունենալով 100 դիտորդ: 2023 թվականի դեկտեմբերին Եվրամիության արտաքին գործերի նախարարները որոշում էին կայացրել առաքելության կազմն ընդլայնել մինչեւ 209 դիտորդ: Ավելի ուշ առաքելությանը միացել էր նաեւ Կանադայի ներկայացուցիչը, ինչին ի պատասխան պաշտոնական Մոսկվայի եւ Բաքվի ներկայացուցչներն հայտարարել էին, որ EUMA-ն «վերածվում է ՆԱՏՕ առաքելության»: EUMA-ի գլխավոր գրասենյակը գտնվում է Եղեգնաձորում, այն նաեւ 6 կայան ունի Ջերմուկում, Եղեգնաձորում, Մարտունիում, Կապանում, Գորիսում եւ Իջեւանում: 2025թ. հունվարի 30-ին ԵՄ որոշեց EUMA-ի մանդատը երկարացնել երկու տարով՝ մինչեւ 2027թ. փետրվարի 19-ը:

Go to News Site