Fréttastofa RÚV
Árið 2012 var heyrnarskimun við upphaf grunnskólagöngu hér á landi hætt. Embætti landlæknis taldi þá að ekki væri nauðsynlegt að skima heyrn allra barna óháð heilsu þeirra. Síðan þá hefur börnum sem eru í eftirliti vegna heyrnarskerðingar fækkað, farið úr 250 árið 2015 í 220 árið 2024. „Miðað við fólksfjölgun ættum við að vera með nær 300 börn í eftirliti hjá okkur. Miðað við þetta þá eru milli 50 og 80 börn einhvers staðar sem eru ekki í eftirliti og ættu að vera það,“ segir Eva Albrechtsen háls-, nef- og eyrnalæknir í Kveik. „Það eru börn þarna úti sem þurfa aðstoð og við myndum mjög gjarnan vilja ná til þeirra.“ Þá hafa 15-20 börn í hverjum árgangi greinst seint á síðustu árum, sem er óeðlilega mikið að mati Heyrnar- og talmeinastöðvarinnar . „Við erum alltaf að fá nokkur börn á ári sem hefði verið hægt að veita einhverja meðferð, endurhæfingu eða íhlutun fyrr,“ segir Eva. „Við sjáum oft að þessi börn eru að ströggla í námi, eru eftir á í málþroska, eiga oft í einhverjum samskiptaerfiðleikum við jafnaldra, en þetta er alveg ótrúlega einstaklingsbundið.“ Hefja á skimanir að nýju Alma Möller heilbrigðisráðherra segir að koma eigi heyrnarskimun á aftur við fjögurra eða sex ára aldur. Ekki er vitað hvenær það verður en vinnuhópur á vegum Embættis landlæknis metur nú hvort og hvernig væri vænlegt að sinna slíkum skimunum. Heldurðu þá að það hafi verið mistök að hætta þessum skimunum á sínum tíma? „Ég get nú ekki sagt það af því að ég veit ekki á hvaða gögnum var byggt. Þetta er fyrir mína tíð í þessum málum. En það var sem sagt álitið að þetta væru fá börn og það ætti að vera hægt að ná þeim í ung- og smábarnavernd,“ segir Alma. Nánar verður fjallað um málið í Kveik í kvöld klukkan 20.15.
Go to News Site