Fréttastofa RÚV
Icelandair upplýsti í morgun að félagið ætti í viðræðum um kaup á 49 prósenta hlut í Fly Play Europe þar sem helstu verðmætin eru flugrekstrarleyfi á Möltu. Haft var eftir Boga Nils Bogasyni, forstjóra Icelandair, að kaupin gætu opnað ný viðskiptatækifæri, einfaldað starfsemina á Íslandi og að slíkt skapaði tækifæri til hagræðingar. Þrotabú Play fær sinn skerf Viðræður Icelandair eru við skuldabréfaeigendur sem lögðu hinu fallna Play til 2,8 milljarða í skuldabréfaútboði gegn tilteknum veðum, meðal annars áðurnefndu dótturfélag á Möltu. Í stað þess að standa í tímafrekum dómsmálum var ákveðið að gefa skuldabréfahöfum tækifæri til að koma félaginu á Möltu í verð; þrotabú Play og þar með kröfuhafar fengju síðan sinn skerf yrði af viðskiptunum. Icelandair og rekstur félagsins hefur verið töluvert til umfjöllunar síðustu mánuði; þrátt fyrir að tekjur félagsins hefðu á síðasta ári aldrei verið meiri og farþegafjöldinn farið í fyrsta skipti yfir fimm milljónir var flugfélagið rekið með rúmlega tveggja milljarða tapi. Eyjólfur Ármannsson, innviðaráðherra, sá meðal annars ástæðu til að viðra áhyggjur sínar af stöðu félagsins og alþjóðlegri samkeppnishæfni í flugi á Íslandi. 26 flugfélög væru með flugsamgöngur til og frá landinu og samkeppnin mikil. „Og Icelandair verður að taka virkan þátt í þeirri samkeppni.“ Forstjóri Icelandair gerði athugasemdir við orð ráðherrans og í framhaldinu áttu þeir í óformlegum samskiptum. Ráðuneytið fékk aldrei formlegt erindi frá Icelandair en ráðherrann sagðist ætla að funda með forstjóranum. Samkvæmt upplýsingum frá ráðuneytinu hefur ekkert orðið af þeim fundi enn sem komið er. Flugmarkaðurinn gjörbreyttur Jón Karl Ólafsson, fyrrverandi forstjóri Icelandair, segir tíðindin í morgun ekki eiga að koma á óvart. „Þetta er bara hluti af því að svara breyttum aðstæðum á flugmarkaði í Evrópu. Fólk veit kannski ekki af því en það hafa orðið gríðarlega miklar breytingar á eignarhaldi flugfélaga, flugfélög sem við þekkjum eru orðin hluti af stórum samstæðum.“ Sem dæmi megi nefna að Air France og KLM séu orðið eitt félag og hafi nýverið keypt SAS sem hafi áður verið ríkisflugfélag og Lufthansa eigi Swiss, Austrian og flugfélög á Ítalíu og svona mætti lengi telja. Flugrekstrarleyfið sem þetta snúist allt um sé ekki dýrt eitt og sér. „Play lagði út í þennan kostnað að setja þetta í gang og það kostar alltaf eitthvað. Þú þarft að leggja fram mikið af gögnum og þú þarft að fá samþykki flugmálayfirvalda og þessu fylgir miklu skriffenska.“ Flugrekstarleyfi sé fyrir Airbus-þotur sem sé það sem Icelandair sé að kaupa. „Ég sé ákveðið hagræði í því frekar en að þeir geri þetta sjálfir sem taki tíma og kosti pening.“ Flugrekstarleyfið sé líka háð þeim leyfum sem séu í gildi hverju sinni. Malta sé í Evrópu og Ísland sé hluti af opna markaði Evrópu þannig að íslensk flugfélög geta flogið hvert sem er til og frá Evrópu. „Þetta geta Bretar til að mynda ekki eftir að þeir fóru útúr Evrópu.“ Á að auka hagræði í rekstri Verðmæti flugrekstrarleyfisins sem slíks sé því ekki mikið heldur felist þau fyrst og fremst í þeirri vinnu sem fór í að fá flugrekstarleyfið. „Síðan er spurning hvaða tækifæri eru fólgin í því að vera með annað flugrekstrarleyfi?“ Væntanlega sé hægt að setja þangað einhverjar vélar og svo sé spurning hvort framtíðarstækkun Icelandair geti farið þarna í gegn sem sé væntanlega fyrsta hugmynd. „Eflaust er þarna lægri launakostnaður, meiri sveigjanleiki.“ Þarna sé því hægt að opna á fleiri staði án þess að vera fastur í vondur veðri í Keflavík. „Þetta er samt augljóslega fyrst og fremsts gert til að auka hagræði í rekstri.“ Kjarasamningar Icelandair við bæði Flugfreyjufélag Íslands og Félag atvinnuflugmanna eru lausir. Berglind Kristófersdóttir, formaður Flugfreyjufélags Íslands, sagðist í samtali við Spegilinn ekkert vita meira um þessi tíðindi en það sem hefði komið fram í fjölmiðlum. Félagið myndi skoða þetta með hagsmuni félagsmanna að leiðarljósi. Ágætis gangur væri í kjaraviðræðunum við Icelandair og verið að velta við öllum steinum. Ekki náðist í formann Félags atvinnuflugmanna þrátt fyrir ítrekaðar tilraunir. Fullyrt var á ferðavefnum ff7punktur.is að sumir í áhöfnum Icelandair væru orðlausir yfir tíðindum dagsins. Telur reksturinn ekki hafa verið viðunandi Jón Karl telur það liggja í augum uppi að tilgangurinn með kaupunum sé að auka samkeppnishæfni Icelandair. „Staðreyndin er sú að félagið hefur ekki greitt arð í níu ár og afkoman hefur ekki verið viðunandi.“ Á því sé fullt af skýringum; COVID og kyrrsetning Max-vélanna en líka hærra olíuverð „Það hafa verið áskoranir en staðreyndin er engu að síður sú að afkoman hefur ekki verið viðunandi, verðið á félaginu er alltof langt og það er mjög skrýtin staða. Augljóslega er verið að finna leiðir til að auka samkeppnishæfni.“ Það hefur lengi verið mikið tilfinningamál að áhafnir Icelandair þurfi að vera íslenskar - Jón Karl segir það fyrst og fremst snúast um raunsæi því það verði alltaf flugrekstur til og frá Íslandi. „Ísland er stór flugmarkaður í öllu samhengi og grundvöllur fyrir því hagkerfi sem við erum með. Ég hef engar áhyggjur af því að hér verði ekki flugrekstur en þessi rómantík með íslenskar áhafnir og íslenskan flugrekstur; það þarf líka að vera ákveðið raunæi í því líka. Ef það fást nægar tekjur til að standa undir því þá er það fínt en ef ekki þá þarf að leita annarra leiða og þá getur vel verið að það verði einhverskonar blöndun í framtíðinni.“
Go to News Site