Mediamax
Երեւան: Մեդիամաքս: Ռուսաստանի Դաշնության փոխվարչապետ Ալեքսեյ Օվերչուկը հայտարարել է, որ TRIPP նախագծի իրականացման մասին համաձայնագրի ստորագրումը խախտել է տարածաշրջանային հավասարակշռությունը Հարավային Կովկասում։ «Խնդիրն այն է, որ դա խախտել է 1828 թվականից ի վեր գոյություն ունեցող տարածաշրջանային հավասարակշռությունը, երբ կնքվել էր Թուրքմենչայի հաշտության պայմանագիրը»,- ասել է նա ՏԱՍՍ-ին տված հարցազրույցում ։ Օվերչուկը հիշեցրել է, որ այն ժամանակ Ռուսական կայսրությանն անցան Երեւանի եւ Նախիջեւանի խանությունների հողերը, իսկ սահմանը հաստատվեց աշխարհագրական բնական սահմանի՝ Արաքս գետի երկայնքով։ Դրանից ի վեր սա ընդհանուր առմամբ խաղաղ սահման է եղել, ինչն ապահովվում էր երկու մեծ հարեւանների պայմանավորվածություններով, ավելացրել է ՌԴ փոխվարչապետը։ Նա շեշտել է, որ Ռուսաստանի մասնակցությունը փոխվարչապետների եռակողմ աշխատանքային խմբին հնարավորություն էր տալիս հավասարակշռել բոլոր երկրների շահերը՝ հաշվի առնելով Հայաստանի ինքնիշխանությունը, իրավազորությունը, տարածքային ամբողջականությունն ու տնտեսական շահերը։ «Ադրբեջանը կառուցողական էր տրամադրված, իսկ Իրանը, որն այդ պահին արդեն ԵԱՏՄ-ի հետ բանակցություններ էր վարում շուկաների փոխադարձ բացման մասին, չէր զգում այն սպառնալիքները, որոնք առաջացրեց ամերիկացիներին Արաքսի հյուսիսային ափ հրավիրելը», - ասել է Օվերչուկը։ «Այժմ Հայաստանում հայտարարվել է, որ այս նախագիծն իրականացվելու է առանց Ռուսաստանի: Թուրքիայում արդեն սկսել են Նախիջեւան տանող երկաթուղու կառուցման համար միջոցներ ծախսել, իսկ Մեղրիի հատվածի վերականգնման հեռանկարները ոչ այնքան ակնհայտ են դարձել։ Այս ամենը ճնշում է ստեղծում Հայաստանի վրա։ Ապաշրջափակման բանակցային գործընթացից Ռուսաստանին դուրս թողնելը մեծ սխալ էր», - ասել է ռուսաստանցի պաշտոնյան։
Go to News Site