Mediamax
Երեւան: Մեդիամաքս: Ռուսաստանի փոխվարչապետ Ալեքսեյ Օվերչուկը հայտարարել է, որ ««Հարավկովկասյան երկաթուղի» (ՀԿԵ) ընկերության կոնցեսիան երրորդ կողմին վաճառելու համար օբյեկտիվ պատճառներ չկան»: ՏԱՍՍ-ին տված հարցազրույցում Օվերչուկը նշել է. «Ռուսաստանում ընդունված է դատել ոչ թե խոսքերով, այլ գործերով: Նրանք (նկատի ունի Հայաստանի իշխանություններին՝ Մեդիամաքս) խլեցին մասնավոր էլեկտրաէներգետիկական ընկերության սեփականության իրավունքը, իսկ հիմա բարձրացրել են երկաթուղային կոնցեսիայի հարցը: Ինչպե՞ս արձագանքել դրան»: «Կոնցեսիայի առաջարկվող վաճառքի արդյունքում հայկական երկաթուղին ոչ միայն կկորցնի ռուսական բեռները, այլեւ, ամենայն հավանականությամբ, փոխգործակցությունը «Ռուսական երկաթուղիների» հետ: Հաշվի առնելով Կասպից ծովում նավագնացության մրցունակության վրա ազդող գործոնները՝ Միջին Ասիայի երկրներից դեպի Հայաստան եւ Թուրքիա ու հակառակ ուղղությամբ նշանակալի բեռնաշրջանառությունն անցնելու է Ռուսաստանի Դաշնության տարածքով: Պետք է կարողանալ մի փոքր ավելի հեռուն տեսնել եւ կանխատեսել, թե ինչպես կզարգանան իրադարձությունները, հատկապես, երբ խոսքը վերաբերում է այնպիսի երկարաժամկետ ներդրումներին, ինչպիսիք են նավահանգստային ենթակառուցվածքները եւ երկաթուղին», - նշել է ռուսական կառավարության ղեկավարի տեղակալը: «Հայկական երկաթուղին, եթե այն պահպանվի, կմնա սեփական տնտեսության կարիքները սպասարկող ճանապարհ, որի իրական հեռանկարները շաղկապված են ԵԱՏՄ-ի հետ: Մեր շահը Հայաստանի, ինչպես եւ տարածաշրջանի բոլոր պետությունների հետ առեւտրի ընդլայնումն է, բայց եթե մեզ ասում են, որ ռուսական ընկերությունների ներկայությունը չի համապատասխանում Հայաստանի շահերին, ապա, ելնելով փոխադարձության սկզբունքից, արդարացի կլինի հարցնել՝ եթե ռուսական ընկերություններն ու գործարարները չեն կարող ներկա գտնվել եւ գումար վաստակել Հայաստանում, ապա ինչո՞ւ հայկական ընկերություններն ու գործարարները կարող են ներկա գտնվել եւ գումար վաստակել Ռուսաստանում»,- նշել է Օվերչուկը: «Առանց փոխադարձ առեւտրի բեռների շարժ չի լինում, եւ հայկական երկաթուղու ծանրաբեռնվածությունը նույնպես կախված է դրանից: Ռուսաստանում գործունեություն ծավալող հայկական բիզնեսը պետք է ուշադրություն դարձնի դրան»,- նշել է Ռուսաստանի փոխվարչապետը:
Go to News Site