Mediamax
Երեւան: Մեդիամաքս: Հայաստանի արտաքին գործերի նախկին նախարար Վարդան Օսկանյանը մեկնաբանել է ապրիլի 1-ին Մոսկվայում կայացած Ռուսաստանի եւ Հայաստանի ղեկավարների հանդիպումը: «Երեկ Մոսկվայում տեղի ունեցած հանդիպումը Նիկոլ Փաշինյանի եւ Վլադիմիր Պուտինի միջեւ իր բովանդակությամբ սովորական պաշտոնական հանդիպում չէր։ Խնամքով հաշվարկված հրապարակային խոսքում Պուտինը փոխանցեց մի ուղերձ, որը միաժամանակ եւ՛ դիվանագիտական էր, եւ՛ քաղաքականապես կործանարար։ Անդրադառնալով Հայաստանի տնտեսական կապերին, անվտանգության խնդիրներին, հիշատակելով Լեռնային Ղարաբաղը, Փաշինյանի անիրատեսական ակնկալիքները Եվրամիության հետ հարաբերություններից եւ նույնիսկ ակնարկելով առաջիկա ընտրությունները՝ նա պարզապես երկկողմ հարաբերությունների եւ տարածաշրջանային խնդիրների ամփոփում չէր անում. նա հստակ հակադրություն էր ձեւակերպում այն բանի միջեւ, թե ինչ Հայաստանը ունեցել է, ինչ է կորցրել եւ ինչ տակավին կարող է կորցնել», - գրել է Վարդան Օսկանյանը: «Պուտինի նախաբանը, ըստ էության, վճիռ էր Փաշինյանի վերաբերյալ։ Եթե հանենք դիվանագիտական ձեւակերպումները, ուղերձը պարզ էր․ դուք կարծես չեք հասկանում, թե ինչ եք անում, դուք սխալ ուղու վրա եք, եւ եթե շարունակեք այդպես, հայ ժողովրդին կհասցնեք անհամեմատ ավելի մեծ վնաս, քան արդեն հասցրել եք», - հավելել է Հայաստանի արտաքին գործերի նախկին նախարարը:
Go to News Site