Փաշինյանն ասել է, որ Պուտինին տեղեկացրել է «նրբության» մասին

Երեւան: Մեդիամաքս: Հայաստանի վարչապետ Նիկոլ Փաշինյանը Ռուսաստան իր աշխատանքային այցը հաջողված է համարում։ «Մեր օրակարգի բոլոր ուղղություններով ձեռք ենք բերել պայմանավորվածություններ՝ մշակույթից սկսած, ռազմատեխնիկական համագործակցությունով ավարտված»,- լրագրողների հետ զրույցում ասել է Նիկոլ Փաշինյանը: Անդրադառնալով Ռուսաստանի փոխվարչապետ Ալեքսեյ Օվերչուկի հայտարարություններին ՝ Նիկոլ Փաշինյանը նշել է, որ որեւէ սպառնալիք չի տեսնում. «Սա բնականոն աշխատանքային գործընթաց է, որի ժամանակ կողմերը ներկայացնում են իրենց դիրքորոշումները»: Մեկնաբանելով Վլադիմիր Պուտինի խոսքերը Հայաստանում կայանալիք ընտրությունների եւ դրանց հնարավոր մասնակիցների մասին, Նիկոլ Փաշինյանը կարծիք է հայտնել, որ Ռուսաստանի նախագահին «տեղյակ չեն պահել այն նրբության մասին», որ վարչապետի թեկնածու կարող են լինել միայն Հայաստանի քաղաքացիները: «Հաշվի առնելով երկրի մասշտաբներն ու այն օրակարգը, որի հետ ամեն օր առնչվում է Ռուսաստանի նախագահը, նույնիսկ մեծ ցանկության դեպքում չէր կարող մտնել այդ մանրամասների մեջ։ Դուք պատկերացնո՞ւմ եք Ռուսաստանի նախագահի օրակարգը: Այսինքն՝ ինքը պիտի՞ մանրամասն ուսումնասիրեր Հայաստանի Սահմանադրությունն ու օրենքները: Ես ընդամենը հայտնել եմ նրան, որ նման նրբություն կա»,- եզրափակել է Նիկոլ Փաշինյանը:

Go to News Site