Fréttastofa RÚV
Bandarísk yfirvöld segjast hafa handtekið tvær konur, mæðgur, náskyldar íranska hershöfðingjanum Qaseem Soleimani, sem drepinn var í drónaárás Bandaríkjahers á Írak í janúar 2020. Ráðuneytið segir móðurina, Hamideh Soleimani Afshar, einarðan stuðningsmann klerkastjórnarinnar í Íran og að hún hafi lýst Bandaríkjunum sem hinum mikla Satan í færslum á samfélagsmiðlum. Marco Rubio utanríkisráðherra hefur afturkallað varanlega og lögmæta vist kvennanna í landinu, að því er segir í tilkynningu ráðuneytisins. Það segir mæðgurnar í haldi innflytjendastofnunar Bandaríkjanna, án þess að tíunda það frekar. Tvær dætur Soleimanis búsettar í Íran þvertaka fyrir nokkurn skyldleika við konurnar, samkvæmt umfjöllun þarlendra miðla. Þær segja yfirlýsingar ráðuneytisins lygi og að enginn ættingi Soleimanis hafi nokkurn tíma búið í Bandaríkjunum. Eiginmanni Soleimani Afshar hefur verið meinað að koma til Bandaríkjanna samkvæmt yfirlýsingu ráðuneytisins. Ráðuneytið segir einnig að dvalarleyfi dóttur og tengdasonar Ali Larijani hafi verið afturkallað. Hvorugt er lengur í Bandaríkjunum og verður ekki heimilað að koma þangað aftur. Larijani var yfirmaður öryggisráðs Íran og drepinn í loftárás Ísraelshers 17. mars. Rubio sagði í færslu á X Trump-stjórnina ekki heimila að Bandaríkin verði griðastaður útlendinga sem styðja hryðjuverkastjórnir andvígar þeim. Qaseem Soleimani var hæst setti herforingi Írans og fór fyrir Quds-sveitum byltingarvarðarins sem bera meðal annars ábyrgð á aðgerðum utan landsteinanna. Soleimani var ráðgjafi og trúnaðarvinur æðstaklerksins Ali Khameneis og var drepinn að fyrirskipan Donalds Trump á seinasta ári fyrri forsetatíðar hans.
Go to News Site