Fréttastofa RÚV
Viðhorf almennings til þjóðkirkjunnar hefur tekið miklum breytingum á síðustu árum. Þetta má meðal annars sjá í könnun Gallups sem mælir traust almennings til stofnana. Fyrir tíu árum sögðust 39 prósent bera traust til þjóðkirkjunnar. Hlutfallið fór lækkandi og var komið niður í 26,1 prósent fyrir tveimur árum. Síðan þá hefur traustið farið vaxandi og mældist tæp 48 prósent í síðustu könnun sem var birt í febrúar. Guðrún Karls Helgudóttir biskup Íslands segir að fleiri leiti til kirkjunnar nú en áður. „Við sjáum það á kirkjusókn og við sjáum það í auknum fjölda í athöfnum. Og kannski síðast en ekki síst að það er ekkert hallærislegt lengur að tala um Guð og að vera trúuð,“ segir Guðrún. Staða heimsmála skýri þessa þróun að vissu leyti. „Það er aukinn óróleiki í heiminum og þá sækir fólk gjarnan í eitthvað sem gefur traust, eitthvað æðra, einhvers konar skjól sem að kirkjan og trúin getur veitt. En ég held að það hafi líka áhrif að kirkjan er orðin sýnilegri og við höfum meðvitað verið að reyna að draga frá í kirkjunni og sýna hvernig kirkjan raunverulega er,“ segir Guðrún. Biskup talaði sérstaklega um Grindvíkinga í páskapredikun í Dómkirkjunni í Reykjavík í morgun. Barátta þeirra við náttúruöflin og vonin um uppbyggingu rími vel við boðskap páskanna. „Það sem að gerðist í Grindavík og það sem er að gerast þar núna, og það má segja það sama um Vestmannaeyjar áður, er svo gott dæmi um upprisu. Um þegar fólk þarf að ganga í gegnum svona mikinn hrylling. Yfirgefa heimilin sín, upplifa alla þessa jarðskjálfta, eldgos og allt sem því fylgir. En eygja þrátt fyrir það von. Von um upprisu og uppbyggingu bæjarins. Þetta er svo gott dæmi um upprisu,“ segir Guðrún.
Go to News Site