Fréttastofa RÚV
Geimfarar NASA fljúga umhverfis tunglið síðar í dag, í fyrsta sinn í meira en hálfa öld. Þetta er hápunktur Artemis-leiðangursins sem hófst síðasta miðvikudag. Flugið umhverfis mánann tekur um sjö klukkustundir frá því kortér fyrir sjö í kvöld að íslenskum tíma og lýkur á öðrum tímanum næstu nótt. NASA sýnir beint frá fluginu á vefsíðu sinni , YouTube, Amazon og Netflix. Á meðan greina tunglfararnir og sérfræðingar á jörðu niðri frá því sem fyrir augu ber. NASA varar við að myndgæði kunni að verða bágborin á stundum í ljósi fjarlægðarinnar, þeirrar mestu sem nokkur maður hefur farið frá jörðinni, eða 406.772 kílómetra. Öll samskipti við Artemis munu rofna í um fjörutíu mínútur meðan Orion-farið verður handan tunglsins. Það fer ekki nær en 6.500 kílómetra sem auðveldar áhöfninni að sjá tunglið í heild, þar með talda báða pólana. Þannig getur hún séð svæði á tunglinu sem aðeins ómönnuð för hafa ljósmyndað. Áhöfnin er þrautþjálfuð í að greina og lýsa nákvæmlega þeim jarðmyndunum sem hún sér. Samkvæmt upplýsingum NASA verður tunglið á stærð við körfubolta sem haldið er í armslengd í augum tunglfaranna. Til samanburðar flugu Apollo-leiðangrarnir hjá tunglinu í 110 kílómetra hæð. Undir lok flugsins upplifir áhöfnin óvenjulegt fyrirbæri, það er að segja sólmyrkva. Í 53 mínútur verður Orion-farið í fullkomlega beinni línu við tunglið og sólina sem þá hverfur sjónum. Þá geta tunglfararnir rannsakaða sólkórónuna sem verður í þeirra augum eins og glóandi geislabaugur. Einnig er möguleiki að þau geti séð blossa frá loftsteinum sem skella á yfirborði tunglsins. Ekki er útilokað að áhöfnin geti tekið eigin útgáfu af þeirri frægu ljósmynd „Jarðaruppkoma“, eða Eartrise sem tunglfarinn William Anders tók í Apollo 8-leiðangrinum 1968. Hún sýnir skærbláa jörðina bera við djúpt myrkur geimsins með gígum stráð yfirborð tunglsins í forgrunni. Artemis 2-leiðangurinn er sögulegur fyrir margar sakir. Þetta er í fyrsta skipti sem kona, Christina Koch, fer að tunglinu og Victor Glover er fyrsti svarti maðurinn sem vinnur það afrek. Jafnframt er Kanadamaðurinn Jeremy Hansen fyrsti tunglfarinn fæddur utan Bandaríkjanna. Leiðangursstjórinn Reid Wiseman er sá eini sem hefur algerlega sama uppruna og hvítu bandarísku tunglfararnir sem tóku þátt í Apollo-leiðöngrunum til tunglsins milli 1968 og 1972.
Go to News Site