ႁူင်းၸၢၵ်ႈႁုင်ယၢမ်း ၼႂ်းၼႃႈတီႈသိုၵ်းဝႃႉၵုမ်းၵမ်ၼၼ်ႉတႅၵ်ႇ ၵူၼ်းတၢႆၼပ်ႉႁူဝ်ပၢၵ်ႇၵေႃႉ

မိူဝ်ႈဝႃးဝၼ်းတီႈ 7/4/2026 ယၢမ်းတၢမ်းၶမ်ႈမွၵ်ႈ 3 မူင်း ႁူင်းၸၢၵ်ႈႁုင်ယၢမ်းလိပ်းတႅၵ်ႇ ၾႆးမႆႈၵႂႃႇတင်းသဵင်ႈ တီႈဝၢၼ်ႈယူင်ႇၶမ်း ႁိမ်းဝဵင်းပၢင်သၢင်း ငဝ်ႈငုၼ်းၸုမ်းသိုၵ်းဝႃႉ UWSA ၵုမ်းၵမ် ၵူၼ်းလူႉတၢႆၵႂႃႇလႅပ်ႈ ဢမ်ႇယွမ်း 200 ၵေႃႉ လႆႈႁူႉၼင်ႇၼႆ။ တီႈႁူင်းၸၢၵ်ႈႁုင်ယၢမ်းလိပ်းၼၼ်ႉ ႁူဝ်ၼႃႈၶဝ်ပဵၼ်ၸၢဝ်းၶႄႇ။ ယၢမ်းလဵဝ် ၾၢႆႇၽူႈမီးပုၼ်ႈၽွၼ်း ၼႂ်းတပ်ႉသိုၵ်းဝႃႉ UWSA လႆႈတီႉၺွပ်း ၵုမ်းၶင်တူဝ်ၸၢဝ်းၶႄႇၼၼ်ႉဝႆႉသေ ၵူတ်ႇထတ်းလွင်ႈတၢင်းပိူင်ပဵၼ် မၼ်းဝႆႉယူႇ ဝႃႈၼႆ။ ယွၼ်ႉႁူင်းၸၢၵ်ႈႁုင်ယၢမ်းလိပ်းတႅၵ်ႇလႄႈ ၵူၼ်းႁဵတ်းၵၢၼ် ၼပ်ႉႁူဝ်ပၢၵ်ႇၵေႃႉ လူႉသဵင်ႈၵႂႃႇ ႁၢၼ်ႉတေႃႇထိုင်ယၢမ်းလဵဝ်ၵေႃႈ ပႆႇလႆႈႁူႉသဵၼ်ႈမၢႆတႅတ်ႈတေႃး ။ ယူႇတီႈၸုမ်းၶၢဝ်ႇၽူႈတွႆႇႁွၵ်ႈတိုၵ်ႉၵပ်းသိုပ်ႇတိတ်းတေႃႇၸူး ၽူႈမီးပုၼ်ႈၽွၼ်းတီႈလုမ်းၵပ်းသၢၼ်ဝႃႉ ၵေႃႈတိတ်းတေႃႇပႆႇလႆႈ ။ လွင်ႈၼႆႉၾၢႆႇတပ်ႉသိုၵ်းဝႃႉ UWSA လႄႈ သိုဝ်ႇၶၢဝ်ႇၸုမ်းသိုၵ်းဝႃႉၵေႃႈ ပႆႇဢွၵ်ႇမႃးပိုၼ်ၽၢဝ်ႇယိုၼ်ယၼ်သင် ပဵၼ်တၢင်းၵၢၼ်။ လႆႈႁူႉဝႃႈ ယၢမ်းဢၼ်ႁုင်ႁဵတ်းဢွၵ်ႇတီႈႁူင်းၸၢၵ်ႈၼၼ်ႉ ဢဝ်ၵႂႃႇၸႂ်ႉတိုဝ်းၼႂ်းၵၢၼ် ၶုတ်းႁိၼ်ယႃႉဢဝ်ႁႄႈ ၵူႈသႅၼ်းသႅၼ်း ဝႃႈၼႆ။ The post ႁူင်းၸၢၵ်ႈႁုင်ယၢမ်း ၼႂ်းၼႃႈတီႈသိုၵ်းဝႃႉၵုမ်းၵမ်ၼၼ်ႉတႅၵ်ႇ ၵူၼ်းတၢႆၼပ်ႉႁူဝ်ပၢၵ်ႇၵေႃႉ appeared first on SHAN News .

Go to News Site