Fréttastofa RÚV
Fiskveiði og köfunarnámskeið er meðal þess sem Skógræktarfélag Kópavogs hefur auglýst í Guðmundarlundi. Mikið vatn er í lundinum eftir leysingar og vætutíð. Snjólaust var í Guðmundarlundi fyrripart vetrar og frost. Ofan í það kom snjór og svo asahláka um páskana. Vatnsdýptin nær sums staðar um metra. Vatnið á ekki greiða leið úr lundinum Veðuraðstæðurnar undanfarið hafa leitt til þess að Guðmundarlundur er nú á floti. Lundurinn er í dæld og vatn á ekki greiða leið þaðan. Kristinn H. Þorsteinsson, framkvæmdastjóri Skógræktarfélags Kópavogs, segir að feikilega mikið vatn sé. „Þetta er komið hér sums staðar í meter og alveg upp í einn og hálfan metra hérna.“ Kópavogsbær brást skjótt við. Grafinn var skurður í gegnum bílastæðið og vatninu hleypt þar niður. Kristinn á þó von á að koma þurfi upp lítilli dælustöð í lundinum. Félagar í Skógræktarfélagi Kópavogs hafa leyft sér að hafa gaman af ástandinu og birt myndir á samfélagsmiðlum af meintri fiskveiði og köfunarnámskeiði í lundinum.
Go to News Site