Fréttastofa RÚV
Landskjörstjórn gerir athugasemdir við orðalag spurningarinnar sem bera á upp í fyrirhugaðri þjóðaratkvæðagreiðslu um aðildarviðræður við Evrópusambandið í ágúst. Þetta kemur fram í umsögn hennar til utanríkismálanefndar frá því í dag. Spurningin, eins og hún er orðuð í þingsályktunartillögu, er eftirfarandi: „Á að halda áfram viðræðum um aðild Íslands að Evrópusambandinu?“ Svarkostir eru: „Já, halda áfram viðræðum um aðild Íslands að Evrópusambandinu“ og „Nei, ekki halda áfram viðræðum um aðild Íslands að Evrópusambandinu.“ Setja út á forsendurnar sem spurningin gefur sér Landskjörstjórn telur að ekki sé hægt að slá því föstu að spurningin „geti ekki vakið tortryggni um að framsetning hennar kunni að hafa áhrif á afstöðu kjósenda“. Er þar vísað til þess að orðalag spurningarinnar feli í sér þá forsendu að aðildarumsókn Íslands hafi ekki verið dregin til baka á sínum tíma. Sú forsenda sé hins vegar umdeild í samfélaginu. „Það er ekki hlutverk landskjörstjórnar að túlka eða leggja mat á stöðu aðildarumsóknar Íslands að Evrópusambandinu en á hinn bóginn verður ekki undan því vikist að benda á að með orðalagi spurningarinnar er gengið út frá ákveðinni forsendu sem ekki er almennt óumdeild.“ Til dæmis gæti kjósandi, sem liti svo á að aðildarviðræðum Íslands hefði verið slitið, átt erfitt með að svara spurningunni með annað hvort já eða nei. „Viðkomandi kjósandi væri mögulega hlynntur aðildarviðræðum en teldi sig ekki geta svarað já því þá væri hann jafnframt að láta þá skoðun í ljós að viðræðunum hefði ekki verið slitið sem væri ekki í samræmi við hans sannfæringu,“ segir í umsögninni. Landskjörstjórn telur betra að spurningin verði orðuð með „opnari hætti þannig að í henni felist ekki afstaða til stöðu viðræðna Íslands við Evrópusambandið“. Leggja til svarkostina „Já“ og „Nei“ Þá er einnig gerð athugasemd við svarmöguleikana sem fram eru settir. Í kosningalögum er gert ráð fyrir því að svarmöguleikar séu skýrir og kjósanda gefnir svarkostirnir „Já“ og „Nei“. Alþingi er þó heimilt að setja spurningu fram með öðrum hætti. Væri slíkri undantekningu beitt þykir landskjörstjórn hins vegar eðlilegt að slíkt væri rökstutt sérstaklega. Er bent á að það sé ekki gert í framkominni þingsályktunartillögu. Landskjörstjórn telur það ekki auka skýrleika að endurtaka spurninguna í svarkostunum sem gefnir eru. „Leggur landskjörstjórn til að svarkostir spurningarinnar verði einungis tilgreindir sem „Já" og „Nei", eins og kveðið er á um í 2. mgr. 66. gr. kosningalaga.“
Go to News Site