Fréttastofa RÚV
Ísland án jökla er raunveruleiki sem nálgast óðfluga ef ekki tekst að ná tökum á losun gróðurhúsalofttegunda, segja jarðvísindamenn. Líkanreikningar sýna að Vatnajökull tapi líklega um 20% af rúmmáli sínu fram til ársins 2100 óháð þróun loftslagsbreytinga. Þetta kemur fram í grein sem birtist í Náttúrufræðingnum þar sem þróun íslenskra jökla er kortlögð. Heildarrúmmál íslenskra jökla var um 3.330 rúmkílómetrar í fyrra og áætlað er að sjávarstaða myndi hækka um níu millimetra ef þeir bráðnuðu allir. Jöklar hylja um 10.009 ferkílómetra af flatarmáli. Langflestir jöklar hér á landi hafa hörfað samfara hlýnandi loftslagi og íslenskir jöklar hafa minnkað um 20% frá árinu 1890. Höfundar greinarinnar segja þetta samsvara því að Hofsjökull, Langjökull og Mýrdalsjökull, eins og við þekkjum þá í dag, væru horfnir. Nærri 40% af þessari rýrnun varð eftir aldamótin 2000 og hafa jöklar tapað um 40 ferkílómetrum af flatarmáli sínu á hverju ári síðustu tvo áratugi. Hlýindatímabil sem hófst um miðjan 10. áratug síðustu aldar stendur enn og frá aldamótum hafa langflestir jökulsporðar hörfað á hverju ári. Mælingar sýna að breytingin sé einna mest á stærri skriðjöklum Vatnajökuls, Langjökuls og Mýrdalsjökuls. Spár benda til þess að jöklar um allan heim haldi áfram að rýrna. Í greininni er vísað í spálíkön sem sýna að framhaldið ræðst að miklu leyti af því hve hratt tekst að draga úr losun gróðurhúsalofttegunda á næstu áratugum. Jöklarannsóknir og fagleg miðlun niðurstaðna séu lykillinn að skynsamlegri stefnumótun og aðlögun að óhjákvæmilegum loftslagsbreytingum af mannavöldum næstu áratugina. „Ef mannkyn nær ekki tökum á losun gróðurhúsalofttegunda er jökullaust Ísland ekki óljós forspá, heldur raunveruleiki sem óðfluga nálgast.“ Höfundar hennar segja brýnt að styrkja langtímavöktun jökla, viðhalda opnum gagnasöfnum og koma skýrum og aðgengilegum upplýsingum til almennings og hagsmunaaðila. Jöklar séu náttúruarfur og mikilvæg auðlind fyrir samfélagið.
Go to News Site