Fagnar boðaðri lækkun og treystir að hún skili sér til neytenda

Framkvæmdastjóri FÍB býst við að lækkun á bensínverði hjálpi til við að draga úr verðbólgu. Lækkun á heimsmarkaðsverði á hráolíu síðustu daga eigi eftir skila sér til neytenda hér heima. Ríkisstjórnin kynnti á föstudag tímabundnar aðgerðir til að draga úr verðbólgu. Virðisaukaskattur á eldsneyti lækkar úr 24% í 11% og olíufélögin verða skylduð með lögum til að skila verðlækkunum til neytenda. Framkvæmdastjóri FÍB fagnar boðaðri lækkun á virðisaukaskatti á eldsneyti og er bjartsýnn á að verðlækkanir skili sér til neytenda. „Við fögnum því að það sé farin þessi leið,“ segir Runólfur Ólafsson, framkvæmdastjóri FÍB. „Við lækkun eldsneytis þá mun það skila um 0,3% lækkun á vísitölunni.“ „Það er allavega ljóst að þessar gríðarlegu hækkanir sem hafa verið að eiga sér stað vegna þessa ófremdarástands í Íran er eitthvað sem íslensk stjórnvöld og okkar hagstjórn ræður ekkert við til lengri tíma og hefur engin áhrif á. Þetta eru þó allavega áhrif til að slá á þetta,“ segir Runólfur. Þrátt fyrir lækkun á heimsmarkaðsverði á hráolíu í liðinni viku hefur verð á bensíni hér heima haldið áfram að hækka. „Við skulum nú gefa markaðnum einhverja daga,“ segir Runólfur. Hann bendir á að hækkanir hafi líka oft verið lengur að skila sér út í verðlagið hér heima. Fólk sem fréttastofa ræddi við á förnum vegi í dag var ánægt með boðaðar verðlækkanir á eldsneyti en sumir telja fleiri aðgerða þörf.

Go to News Site